سیدنا عبداللہ بن عمر رضی اللہ عنہما نے نبی کریم صلی اللہ علیہ وسلم کا یہ فرمان نقل کیا: ”عورتیں تین دن کا سفر ذی رحم محرم کے بغیر نہ کریں۔“ [اللؤلؤ والمرجان/كتاب الحج/حدیث: 847]

سیدنا ابو سعید خدری رضی اللہ عنہ کہتے تھے کہ میں نے چار باتیں نبی کریم صلی اللہ علیہ وسلم سے سنی تھیں، یہ باتیں مجھے انتہائی پسند ہیں: ”کوئی عورت دو دن کا سفر اس وقت تک نہ کرے جب تک اس کے ساتھ اس کا شوہر یا کوئی ذو رحم محرم نہ ہو، اور نہ تین مساجد کے سوا کسی کے لیے کجاوے باندھے جائیں: مسجد حرام، میری (مسجد نبوی) اور مسجد اقصی۔“ [اللؤلؤ والمرجان/كتاب الحج/حدیث: 848]

سیدنا ابوہریرہ رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا: ”کسی خاتون کے لیے جو اللہ اور اس کے رسول صلی اللہ علیہ وسلم پر ایمان رکھتی ہو جائز نہیں کہ ایک دن رات کا سفر بغیر کسی ذی رحم محرم کے کرے۔“ [اللؤلؤ والمرجان/كتاب الحج/حدیث: 849]

سیدنا ابن عباس رضی اللہ عنہما نے بیان کیا کہ نبی کریم صلی اللہ علیہ وسلم نے فرمایا کہ ”کوئی مرد کسی (غیر محرم) عورت کے ساتھ تنہائی میں نہ بیٹھے اور کوئی عورت اس وقت تک سفر نہ کرے جب تک اس کے ساتھ اس کا کوئی محرم نہ ہو۔“ اتنے میں ایک صحابی کھڑے ہوئے اور عرض کیا: یا رسول اللہ! میں نے فلاں جہاد میں اپنا نام لکھوا دیا ہے اور ادھر میری بیوی حج کے لیے جا رہی ہے۔ آپ صلی اللہ علیہ وسلم نے فرمایا کہ ”پھر تو بھی جا اور اپنی بیوی کے ساتھ حج کر۔“ [اللؤلؤ والمرجان/كتاب الحج/حدیث: 850]