سیدنا براء بن عازب رضی اللہ عنہ نے بیان کیا کہ جب رسول اللہ صلی اللہ علیہ وسلم نے حدیبیہ کی صلح (قریش سے) کی تو اس کی دستاویز سیدنا علی رضی اللہ عنہ نے لکھی تھی۔ انہوں نے اس میں لکھا محمد اللہ کے رسول صلی اللہ علیہ وسلم کی طرف سے۔ مشرکین نے اس پر اعتراض کیا کہ لفظ محمد کے ساتھ رسول اللہ نہ لکھو، اگر آپ رسول اللہ ہوتے تو ہم آپ سے لڑتے ہی کیوں؟ آنسیدنا صلی اللہ علیہ وسلم نے سیدنا علی رضی اللہ عنہ سے فرمایا: ”رسول اللہ کا لفظ مٹا دو۔“ علی رضی اللہ عنہ نے کہا کہ میں تو اسے نہیں مٹا سکتا تو آنسیدنا صلی اللہ علیہ وسلم نے خود اپنے ہاتھ سے مٹا دیا اور مشرکین کے ساتھ اس شرط پر صلح کی کہ آپ اپنے اصحاب کے ساتھ آئندہ سال تین دن کے لیے مکہ آئیں اور ہتھیار میان میں رکھ کر داخل ہوں، سیدنا براء رضی اللہ عنہ سے ان کے شاگردوں نے پوچھا کہ «جُلُبَانُ السِّلَاحِ» جس کا یہاں ذکر کیا ہے کیا چیز ہوتی ہے؟ تو انہوں نے بتایا کہ ”میان اور جو چیز اس کے اندر ہوتی ہے اس کا نام جلبان ہے۔“ [اللؤلؤ والمرجان/كتاب الجهاد/حدیث: 1167]

سیدنا ابو وائل رحمہ اللہ نے بیان کیا کہ ہم مقام صفین میں ڈیرے ڈالے ہوئے تھے، پھر سیدنا سہل بن حنیف رضی اللہ عنہ کھڑے ہوئے اور فرمایا: اے لوگو! تم خود اپنی رائے کو غلط سمجھو، ہم صلح حدیبیہ کے موقع پر رسول اللہ صلی اللہ علیہ وسلم کے ساتھ تھے، اگر ہمیں لڑنا ہوتا تو اس وقت ضرور لڑتے۔ سیدنا عمر رضی اللہ عنہ اس موقع پر آئے (یعنی حدیبیہ میں) اور عرض کیا: یا رسول اللہ! کیا ہم حق پر اور وہ باطل پر نہیں ہیں؟ آنسیدنا صلی اللہ علیہ وسلم نے فرمایا: ”کیوں نہیں!“ سیدنا عمر رضی اللہ عنہ نے کہا: کیا ہمارے مقتول جنت میں اور ان کے مقتول جہنم میں نہیں جائیں گے؟ آنسیدنا صلی اللہ علیہ وسلم نے فرمایا: ”کیوں نہیں!“ پھر سیدنا عمر رضی اللہ عنہ نے کہا کہ ہم اپنے دین کے معاملے میں پھر کیوں دبیں؟ کیا ہم (مدینہ) واپس چلے جائیں گے اور ہمارے اور ان کے درمیان اللہ کوئی فیصلہ نہیں کرے گا؟ آنسیدنا صلی اللہ علیہ وسلم نے فرمایا: ”ابن خطاب! میں اللہ کا رسول ہوں اور اللہ مجھے کبھی برباد نہیں کرے گا۔“ اس کے بعد سیدنا عمر رضی اللہ عنہ سیدنا ابوبکر رضی اللہ عنہ کے پاس گئے اور ان سے وہی سوالات کیے جو نبی کریم صلی اللہ علیہ وسلم سے ابھی کر چکے تھے، انہوں نے بھی یہی کہا کہ آنسیدنا صلی اللہ علیہ وسلم اللہ کے رسول ہیں اور اللہ انہیں کبھی برباد نہیں ہونے دے گا۔ پھر سورۂ فتح نازل ہوئی اور آنسیدنا صلی اللہ علیہ وسلم نے سیدنا عمر رضی اللہ عنہ کو اسے آخر تک پڑھ کر سنایا، تو سیدنا عمر رضی اللہ عنہ نے عرض کیا: کیا یہی فتح ہے؟ آنسیدنا صلی اللہ علیہ وسلم نے فرمایا: ”ہاں! بلا شک یہی فتح ہے۔“ [اللؤلؤ والمرجان/كتاب الجهاد/حدیث: 1168]