حضرت شقیق بن سلمہ کہتے ہیں کہ میں نے حضرت علی رضی اللہ عنہ کے پیچھے نماز پڑھی، انہوں نے دائیں اور بائیں جانب سلام پھیرا اور کہا: السَّلاَمُ عَلَیْکُمْ وَرَحْمَۃُ اللہِ، السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3080]

حضرت ابورزین کہتے ہیں کہ حضرت علینے نماز میں دائیں اور بائیں جانب سلام پھیرا اور بائیں جانب کا سلام ذرا ہلکی آواز سے تھا۔ [مصنف ابن ابي شيبه/كتاب الصلوات/حدیث: 3081]

حضرت ابراہیم بن سوید کہتے ہیں کہ حضرت علقمہ دائیں جانب سلام پھیرتے اور السَّلاَمُ عَلَیْکُمْ وَرَحْمَۃُ اللہِ کہتے اور پھر بائیں جانب سلام پھیرتے اور السَّلاَمُ عَلَیْکُمْ وَرَحْمَۃُ اللہِ کہتے۔ اور حضرت اسود دائیں جانب سلام پھیرتے تو کہتے: السَّلاَمُ عَلَیْکُمْ وَرَحْمَۃُ اللہِ وَبَرَکَاتُہُ اور بائیں جانب سلام پھیرتے تو یہ کہتے: السَّلاَمُ عَلَیْکُمْ وَرَحْمَۃُ اللہِ وَبَرَکَاتُہُ [مصنف ابن ابي شيبه/كتاب الصلوات/حدیث: 3082]

حضرت خیثمہ نے سلام پھیرتے ہوئے کہا: السَّلاَمُ عَلَیْکُمْ وَرَحْمَۃُ اللہِ، السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3083]

حضرت منصور کہتے ہیں کہ حضرت ابراہیم نے سلام پھیرتے ہوئے کہا: السَّلاَمُ عَلَیْکُمْ وَرَحْمَۃُ اللہِ، السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3084]

حضرت عبد الاعلیٰ فرماتے ہیں کہ حضرت عبد اللہ نے دائیں جانب سلام پھیرتے ہوئے کہا: السَّلاَمُ عَلَیْکُمْ وَرَحْمَۃُ اللہِ اور بائیں جانب سلام پھیرتے ہوئے کہا: السَّلاَمُ عَلَیْکُمْ وَرَحْمَۃُ اللہِ۔ [مصنف ابن ابي شيبه/كتاب الصلوات/حدیث: 3085]

حضرت یزید بن ابی زیاد فرماتے ہیں کہ حضرت ابراہیم نے دائیں جانب سلام پھیرا تو السَّلاَمُ عَلَیْکُمْ وَرَحْمَۃُ اللہِ کہا اور بلندآواز سے کہا۔ پھر بائیں جانب سلام پھیرا تو السَّلاَمُ عَلَیْکُمْ وَرَحْمَۃُ اللہِ کہا اور پہلے سے آہستہ آواز سے کہا۔ [مصنف ابن ابي شيبه/كتاب الصلوات/حدیث: 3086]

حضرت شعبی فرماتے ہیں کہ حضرت سعید اور حضرت عمار نے دونوں جانب سلام پھیرا۔ [مصنف ابن ابي شيبه/كتاب الصلوات/حدیث: 3087]

حضرت محمد بن منتشر کہتے ہیں کہ حضرت مسروق کی مسجد کے امام دو مرتبہ سلام پھیرا کرتے تھے، ہم نے اس بارے میں حضرت مسروق سے عرض کیا تو انہوں نے کہا کہ میں نے ہی اسے ایسا کرنے کو کہا ہے۔ [مصنف ابن ابي شيبه/كتاب الصلوات/حدیث: 3088]

حضرت حکم فرماتے ہیں کہ حضرت ابن ابی لیلیٰ دائیں اور بائیں جانب سلام پھیرتے اور السَّلاَمُ عَلَیْکُمْ، السَّلاَمُ عَلَیْکُمْ کرتے تھے۔ [مصنف ابن ابي شيبه/كتاب الصلوات/حدیث: 3089]