حضرت ابو معمر کہتے ہیں کہ میں نے حضرت خباب سے پوچھا کہ آپ کو ظہر اور عصر میں حضور صلی اللہ علیہ وآلہ وسلم کی قراءت کا کیسے پتہ چلتا تھا؟ انہوں نے فرمایا کہ داڑھی مبارک کے ہلنے کی وجہ سے۔ [مصنف ابن ابي شيبه/كتاب الصلوات/حدیث: 3673]

حضرت ابو الاحوص کہتے ہیں کہ صحابہ کر امظہر اور عصر میں داڑھی مبارک کے ہلنے سے حضور صلی اللہ علیہ وآلہ وسلم کی قراءت کا اندازہ لگاتے تھے۔ [مصنف ابن ابي شيبه/كتاب الصلوات/حدیث: 3674]

حضرت ابن عباس رضی اللہ عنہما فرماتے ہیں کہ میں نہیں جانتا کہ رسول اللہ صلی اللہ علیہ وآلہ وسلم ظہر اور عصر میں قراءت کرتے تھے یا نہیں، البتہ ہم قراءت کیا کرتے تھے۔ [مصنف ابن ابي شيبه/كتاب الصلوات/حدیث: 3675]

حضرت ابوہریرہ فرماتے ہیں کہ میں ہر نماز میں قراءت کرتا ہوں، جس نماز میں حضور صلی اللہ علیہ وآلہ وسلم نے آہستہ قراءت کی میں اس میں آہستہ قراءت کرتا ہوں اور جس میں حضور صلی اللہ علیہ وآلہ وسلم نے بلند آواز سے قراءت کی میں بھی اس میں بلندآواز سے قراءت کرتا ہوں۔ [مصنف ابن ابي شيبه/كتاب الصلوات/حدیث: 3676]