عقبہ بن ابی جسرہ سے روایت ہے، انہوں نے کہا کہ میں نے اسحاق بن عبداللہ بن حارث سے جمعہ کے دن غسل کرنے کے متعلق دریافت کیا تو انہوں نے بتایا: ”عبداللہ بن حارث سفر اور حضر (گھر پر موجودگی) دونوں حالتوں میں جمعہ کے دن غسل کیا کرتے تھے۔“ [مصنف ابن ابي شيبه/كتاب الجمعة/حدیث: 5133]

عبد اللہ بن معدان سے روایت ہے کہ میں نے حبیب سے سنا، ان سے ایک شخص نے سوال کیا: ”آپ غسلِ جمعہ کے متعلق کیا فرماتے ہیں، کیا وہ واجب ہے؟“ تو انہوں نے جواب دیا: ”میں نے طلق کو دیکھا کہ انہیں مکہ سے حجاج کی طرف قیدی بنا کر لایا گیا، لیکن انہوں نے (اس کٹھن حالت میں بھی) جمعہ کا غسل نہیں چھوڑا۔“ [مصنف ابن ابي شيبه/كتاب الجمعة/حدیث: 5134]

جابر رحمہ اللہ ابوجعفر رحمہ اللہ سے روایت کرتے ہیں کہ وہ دورانِ سفر بھی ہر جمعہ کے دن غسل کیا کرتے تھے۔ [مصنف ابن ابي شيبه/كتاب الجمعة/حدیث: 5135]

زیاد بن حدیر رحمہ اللہ سے روایت ہے، انہوں نے کہا: ”میں نے جمعہ کے دن ایک سفر کے دوران سیدنا طلحہ رضی اللہ عنہ کے لیے پردہ کیا تو انہوں نے غسل فرمایا۔“ [مصنف ابن ابي شيبه/كتاب الجمعة/حدیث: 5136]