سماک بن حرب سے روایت ہے، انہوں نے کہا کہ میں نے ان سے دریافت کیا کہ سیدنا نعمان بن بشیر رضی اللہ عنہ کس طرح خطبہ دیا کرتے تھے؟ انہوں نے کہا: وہ اپنے دونوں ہاتھوں کو حرکت دے کر «يلمع» ”اشارہ فرمایا کرتے تھے“، اور مروی ہے کہ سیدنا ضحاک بن قیس رضی اللہ عنہ جب خطبہ دیتے تو اپنا ہاتھ اپنے منہ پر رکھ لیا کرتے تھے۔ [مصنف ابن ابي شيبه/كتاب الجمعة/حدیث: 5314]

سیدنا عمارہ بن رویبہ رضی اللہ عنہ سے روایت ہے کہ انہوں نے بشر بن مروان کو منبر پر (دعا کے لیے) اپنے دونوں ہاتھ اٹھاتے ہوئے دیکھا تو فرمایا: ”اللہ تعالیٰ ان دونوں ہاتھوں کو غارت کرے، یقیناً میں نے رسول اللہ صلی اللہ علیہ وسلم کو دیکھا ہے کہ آپ صلی اللہ علیہ وسلم (دورانِ خطبہ) اپنے ہاتھ سے صرف اسی طرح اشارہ کرنے پر اکتفا فرماتے تھے“ اور انہوں نے اپنی شہادت کی انگلی سے اشارہ فرما کر دکھایا۔ [مصنف ابن ابي شيبه/كتاب الجمعة/حدیث: 5315]

مجاہد رحمہ اللہ سے روایت ہے، انہوں نے فرمایا: ”جمعہ کے دن امام کا (اپنے ہاتھ سے) اشارہ کرنا ہی اس کی طرف سے اذن (اجازت) ہے۔“ [مصنف ابن ابي شيبه/كتاب الجمعة/حدیث: 5316]

ابن سیرین سے روایت ہے کہ انہوں نے کہا: لوگ (دورانِ خطبہ) امام سے اس وقت اجازت طلب کرتے تھے جب وہ منبر پر ہوتا تھا، پھر جب زیاد کا دور آیا اور لوگوں نے یہ کثرت سے کرنا شروع کیا تو اس نے کہا: ”جس نے اپنی ناک پر ہاتھ رکھا، تو وہی اس کی اجازت ہے۔“ [مصنف ابن ابي شيبه/كتاب الجمعة/حدیث: 5317]