حضرت ابو جعد ضمری سے روایت ہے کہ نبی صلی اللہ علیہ وآلہ وسلم نے ارشاد فرمایا کہ جس شخص نے تین جمعے بلا عذر چھوڑ دیئے اس کے دل پر مہر لگادی جاتی ہے۔ [مصنف ابن ابي شيبه/كتاب الجمعة/حدیث: 5646]

حضرت ابن عمر رضی اللہ عنہما اور حضرت ابن عباس رضی اللہ عنہما فرماتے ہیں کہ نبی صلی اللہ علیہ وآلہ وسلم نے منبر پر بیٹھ کر ارشاد فرمایا کہ لوگ جمعہ چھوڑنے سے باز آجائیں ورنہ اللہ ان کے دلوں پر مہر لگادے گا اور انہیں غافلوں میں سے لکھ دے گا۔ [مصنف ابن ابي شيبه/كتاب الجمعة/حدیث: 5647]

حضرت سمرہ بن جندب سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جس شخص نے بغیر عذر کے جمعہ چھوڑا وہ ایک دینار صدقہ کرے، اگر ایک دینار نہ ملے تو آدھا دینار صدقہ کردے۔ [مصنف ابن ابي شيبه/كتاب الجمعة/حدیث: 5648]

حضرت ابن عباس رضی اللہ عنہما فرماتے ہیں کہ جس شخص نے مسلسل تین جمعے چھوڑ دیئے اللہ تعالیٰ اس کے دل پر مہر لگادیتا ہے۔ [مصنف ابن ابي شيبه/كتاب الجمعة/حدیث: 5649]

حضرت ابوہریرہ فرماتے ہیں کہ اگر مجھے کئی سرخ اونٹ مل جائیں تو یہ مجھے اس کے مقابلے میں پسند نہیں کہ میں بلا عذر جمعہ کی نماز چھوڑ دوں۔ [مصنف ابن ابي شيبه/كتاب الجمعة/حدیث: 5650]

حضرت محمد بن عباد بن جعفر سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ ہوسکتا ہے تم میں سے کوئی دو یا تین میل کے فاصلے پر بکریوں کا ریوڑ رکھے اور پھر جمعہ کے لئے نہ آئے، پھر جمعہ آئے اور وہ جمعہ کی نماز کے لئے نہ آئے، پھر جمعہ آئے اور وہ جمعہ کی نماز کے لئے نہ آئے تو اللہ تعالیٰ اس کے دل پر مہر لگادے۔ [مصنف ابن ابي شيبه/كتاب الجمعة/حدیث: 5651]

حضرت عبد اللہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ میرا دل چاہتا ہے کہ ایک آدمی کو نماز پڑھانے کا کہوں اور میں ان لوگوں کے گھروں کو جاکر جلا دوں جو جمعہ کی نماز نہیں پڑھتے۔ [مصنف ابن ابي شيبه/كتاب الجمعة/حدیث: 5652]

حضرت مجاہد فرماتے ہیں کہ ایک آدمی ایک مہینے تک حضرت عبد اللہ بن عباس رضی اللہ عنہما سے سوال کرتا رہا کہ ایک آدمی ساری رات قیام کرتا ہے اور دن کو روزہ رکھتا ہے لیکن وہ جمعہ اور جماعت میں شریک نہیں ہوتا تو اس کا کیا حکم ہے؟ حضرت عبد اللہ بن عباس رضی اللہ عنہما نے فرمایا کہ وہ جہنمی ہے۔ [مصنف ابن ابي شيبه/كتاب الجمعة/حدیث: 5653]