حضرت محمد بن عبد الرحمن کہتے ہیں کہ حضرت اسود ہمیں حکم دیتے تھے کہ عید الفطر کے دن نماز کے لئے جانے سے پہلے ہم کچھ کھا لیں۔ [مصنف ابن ابي شيبه/أول العيدين/حدیث: 5709]

حضرت ام درداء فرماتی ہیں کہ عید الفطر کے دن نماز کے لئے جانے سے پہلے کچھ کھالو خواہ ایک کھجور ہی کیوں نہ ہو۔ [مصنف ابن ابي شيبه/أول العيدين/حدیث: 5710]

حضرت سائب بن یزید فرماتے ہیں کہ سنت یہ ہے کہ تم عید الفطر کے دن عید کے لئے جانے سے پہلے کچھ کھالو۔ [مصنف ابن ابي شيبه/أول العيدين/حدیث: 5711]

حضرت ابن عباس رضی اللہ عنہما فرماتے ہیں کہ جب تم عید الفطر کے لئے جانے لگو تو کچھ کھالو، خواہ ایک کھجور ہی کیوں نہ ہو۔ [مصنف ابن ابي شيبه/أول العيدين/حدیث: 5712]

حضرت عمر بن عبد العزیز نے عید الفطر کے دن خطبہ دیتے ہوئے ارشاد فرمایا کہ یہ وہ دن ہے جس میں کچھ کھانا اور کچھ پینا حاصل کیا جاتا ہے، لہٰذا تم کچھ کھالو اور کچھ پی لو۔ [مصنف ابن ابي شيبه/أول العيدين/حدیث: 5713]

حضرت مجاہد فرماتے ہیں کہ عید الفطر کی نماز کے لئے آنے سے پہلے کچھ کھالو۔ [مصنف ابن ابي شيبه/أول العيدين/حدیث: 5714]

حضرت ابراہیم فرماتے ہیں کہ تمیم بن سلمہ عید الفطر کی نماز کے لئے نکلے، ان کے ساتھ ان کے ایک ساتھی بھی تھے، انہوں نے اپنے ساتھی سے کہا کہ کیا تم نے کچھ کھایا ہے؟ انہوں نے کہا نہیں۔ اس پر حضرت تمیم ایک دکاندار کے پاس گئے اور اس سے ایک کھجور یا کوئی اور چیز مانگ کر اپنے ساتھی کو دی جو اس نے کھالی۔ حضرت ابراہیم فرماتے ہیں کہ عید کی نماز سے پہلے کچھ نہ کھانا ان کے لیے سوال کرنے سے زیادہ برا تھا۔ [مصنف ابن ابي شيبه/أول العيدين/حدیث: 5715]

حضرت ابو مجلز نے فرمایا کہ کیا تم نے عید کے لئے جانے سے پہلے کچھ کھالیا؟ [مصنف ابن ابي شيبه/أول العيدين/حدیث: 5716]

حضرت ابو اسحاق کہتے ہیں کہ ایک صحابی عید الفطر کے دن عید گاہ کی طرف جانے سے پہلے کچھ کھانے کا حکم دیتے تھے۔ [مصنف ابن ابي شيبه/أول العيدين/حدیث: 5717]

حضرت سعید بن مسیب فرماتے ہیں کہ اسلاف اس بات کا حکم دیتے تھے کہ آدمی عید الفطر کے دن روانہ ہونے سے پہلے کچھ کھالے۔ [مصنف ابن ابي شيبه/أول العيدين/حدیث: 5718]