حضرت عائشہ رضی اللہ عنہا فرماتی ہیں کہ بعض اوقات نبی کریم صلی اللہ علیہ وآلہ وسلم صبح کے وقت کھانا منگواتے، نہ ہوتا تو آپ اس دن روزہ رکھ لیتے۔ [مصنف ابن ابي شيبه/كتاب الصيام/حدیث: 9353]

حضرت ام دردائ فرماتی ہیں کہ کبھی حضرت ابو الدرداء صبح کے وقت کھانا منگواتے، نہ ہوتا تو آپ اس دن روزہ رکھ لیتے۔ [مصنف ابن ابي شيبه/كتاب الصيام/حدیث: 9354]

حضرت انس رضی اللہ عنہ فرماتے ہیں کہ حضرت ابو طلحہ اپنے گھر والوں سے پوچھتے کہ کیا تمہارے پاس کھانے کے لئے کوئی چیز ہے؟ وہ جواب دیتے نہیں۔ تو آپ روزہ رکھ لیتے۔ ثقفی کی روایت میں اضافہ ہے کہ اگر ان کے پاس کچھ ہوتا تو روزہ نہ رکھتے۔ [مصنف ابن ابي شيبه/كتاب الصيام/حدیث: 9355]

حضرت حارث فرماتے ہیں کہ حضرت معاذ زوال کے بعد اپنے گھر والوں کے پاس آتے اور ان سے پوچھتے کہ کیا تمہارے پاس کھانے کے لئے کچھ ہے؟ وہ معذرت کرتے تو حضرت معاذ فرماتے کہ باقی دن میرا روزہ ہے۔ ان سے کہا جاتا کہ آپ دن کے آخری حصہ میں روزہ رکھیں گے۔ وہ فرماتے کہ جس نے دن کے آخری حصہ میں روزہ نہیں رکھا اس نے اول حصہ میں روزہ نہیں رکھا۔ [مصنف ابن ابي شيبه/كتاب الصيام/حدیث: 9356]

حضرت ام دردائ فرماتی ہیں کہ بعض اوقات حضرت ابو دردائ دوپہر کو کھانا طلب کرتے، اگر ہمارے پاس کھانا نہ ہوتا تو وہ روزہ رکھ لیتے۔ [مصنف ابن ابي شيبه/كتاب الصيام/حدیث: 9357]

حضرت ابو اشعث کہتے ہیں کہ حضرت معاذ چاشت کے بعد اپنے گھر والوں کے پاس آتے اور ان سے کھانا طلب کرتے، اگر کھانا نہ ہوتا تو وہ اس دن روزہ رکھ لیتے۔ [مصنف ابن ابي شيبه/كتاب الصيام/حدیث: 9358]