حضرت ابن عباس رضی اللہ عنہما فرماتے ہیں کہ اگر معتکف نے جماع کرلیا تو اس کا اعتکاف ٹوٹ گیا اب وہ دوبارہ اعتکاف کرے۔ [مصنف ابن ابي شيبه/كتاب الصيام/حدیث: 9939]

حضرت عطاء فرماتے ہیں کہ وہ اپنے اعتکاف کی قضا کرے گا۔ [مصنف ابن ابي شيبه/كتاب الصيام/حدیث: 9940]

حضرت سعید بن مسیب، حضرت قاسم اور حضرت سالم فرماتے ہیں کہ وہ نئے سرے سے اعتکاف کرے گا۔ [مصنف ابن ابي شيبه/كتاب الصيام/حدیث: 9942]

حضرت حسن فرماتے ہیں کہ حالت اعتکاف میں بیوی سے جماع کرنا رمضان میں بیوی سے جماع کرنے کی طرح ہے۔ اس پر وہی لازم ہے جو رمضان میں جماع کرنے والے پر لازم ہے۔ [مصنف ابن ابي شيبه/كتاب الصيام/حدیث: 9943]

حضرت ضحاک فرماتے ہیں کہ لوگ حالت اعتکاف میں جماع کیا کرتے تھے اس پر یہ آیت نازل ہوئی { وَلاَ تُبَاشِرُوہُنَّ وَأَنْتُمْ عَاکِفُونَ فِی الْمَسَاجِدِ } جب تم مسجد میں اعتکاف کی حالت میں ہو تو اپنی بوایوں سے جماع نہ کرو۔ [مصنف ابن ابي شيبه/كتاب الصيام/حدیث: 9944]

حضرت زہری فرماتے ہیں کہ حالت اعتکاف میں بیوی سے جماع کرنے والے پر وہی کفارہ لازم ہے جو رمضان میں جماع کرنے والے پر لازم ہے۔ [مصنف ابن ابي شيبه/كتاب الصيام/حدیث: 9945]

حضرت مجاہد فرماتے ہیں کہ معتکف نے اگر جماع کیا تو وہ دو دینار صدقہ کرے گا۔ [مصنف ابن ابي شيبه/كتاب الصيام/حدیث: 9946]

حضرت شعبی فرماتے ہیں کہ اگر کسی عورت نے نذر مانی کہ وہ پچاس دن تک اعتکاف کرے گی، ابھی چالیس دن گذرے تھے کہ اس کے خاوند نے اس سے ہمبستری کی تو وہ باقی دن پورے کرلے۔ [مصنف ابن ابي شيبه/كتاب الصيام/حدیث: 9947]