حضرت شعبی سے مروی ہے کہ نبی کریم صلی اللہ علیہ وآلہ وسلم نے حضرت عبد اللہ بن رواحہ کو یمن بھیجا کہ وہ تخمینہ لگائیں ان پر کھجوروں کا۔ راوی کہتے ہیں کہ میں نے حضرت شعبی سے پوچھا کیا انہوں نے ایسا کیا؟ آپ نے فرمایا کہ نہیں۔ [مصنف ابن ابي شيبه/كتاب الزكاة/حدیث: 10861]

حضرت ابوبکر بن حزم سے مروی ہے کہ نبی کریم صلی اللہ علیہ وآلہ وسلم جب کسی تخمینہ لگانے والے کو بھیجتے تو اس کو حکم فرماتے کہ ان کھجوروں کا تخمینہ نہ لگائے جو مالک نے کسی محتاج کو دی ہوئی ہیں۔ [مصنف ابن ابي شيبه/كتاب الزكاة/حدیث: 10863]

حضرت عبد الرحمن بن مسعود فرماتے ہیں کہ حضرت سھل بن ابو حثمہ ہماری مجلس میں تشریف لائے اور نبی کریم صلی اللہ علیہ وآلہ وسلم کی حدیث ہمیں سنائی کہ آپ صلی اللہ علیہ وآلہ وسلم نے فرمایا: جب تم تخمینہ لگاؤ تو لے لو اور ایک تہائی چھوڑ دو، اگر تم تہائی نہ پاؤ تو چوتھائی چھوڑ دو۔ [مصنف ابن ابي شيبه/كتاب الزكاة/حدیث: 10864]

حضرت بشیر بن یسار فرماتے ہیں کہ حضرت عمر فاروق نے حضرت ابو خیثمہ کو کھجوروں کا تخمینہ لگانے کے لئے بھیجا تو ان سے فرمایا کہ جب تم گھر والوں کے پاس ان کی چاردیواری میں آؤ تو جتنی مقدار وہ کھاتے ہیں اس کا تخمینہ نہ لگاؤ۔ [مصنف ابن ابي شيبه/كتاب الزكاة/حدیث: 10865]

حضرت جابر فرماتے ہیں کہ حضرت عبد اللہ بن رواحہ نے خیبر کی کھجوروں کا تخمینہ لگایا تو وہ چالیس ہزار وسق تھے۔ حضرت جابر کا خیال تھا کہ حضرت ابن رواحہ نے جب یہودیوں کو اختیار دیا تو انہوں نے کھجور لی اور ان پر ٢٠ ہزار وسق لازم تھے۔ [مصنف ابن ابي شيبه/كتاب الزكاة/حدیث: 10866]

حضرت مکحول سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: لوگوں پر تخمینہ لگانے میں تخفیف کا معاملہ کرو۔ بیشک لوگوں کے مال میں کچھ کھجوریں محتاجوں کیلئے ہوتی ہیں اور کچھ گری ہوئی ہوتی ہیں جنہیں لوگ روندتے ہیں۔ [مصنف ابن ابي شيبه/كتاب الزكاة/حدیث: 10867]

حضرت سعید بن مسیب سے مروی ہے کہ نبی کریم صلی اللہ علیہ وآلہ وسلم نے حضرت عتاب بن اسید کو حکم فرمایا کہ وہ تخمینہ لگائیں انگوروں کا جیسا کہ کھجوروں کا لگایا جاتا ہے۔ پھر کشمش سے اس کی زکوٰۃ ادا کی جائے۔ جیسے کہ کھجور کی زکوٰۃ خشک کھجور سے ادا کی جاتی ہے۔ کھجور اور انگور میں نبی کریم صلی اللہ علیہ وآلہ وسلم کا یہی طریقہ ہے۔ [مصنف ابن ابي شيبه/كتاب الزكاة/حدیث: 10868]

حضرت عمرو بن دینار فرماتے ہیں کہ کھجوروں اور انگوروں کا تخمینہ لگایا جائے گا لیکن دانوں کا تخمینہ نہیں لگایا جائے گا۔ [مصنف ابن ابي شيبه/كتاب الزكاة/حدیث: 10869]