حضرت ابو بشر کہتے ہیں کہ میں نے حضرت جابر بن زید سے دریافت کیا کہ میں نے حالت احرام میں چہرے پر جوں پائی ہے؟ آپ نے فرمایا اس کو پھینک دے اس میں تیرے لیے کوئی حصہ نہیں ہے۔ [مصنف ابن ابي شيبه/كتاب الحج/حدیث: 13602]

ایک عورت حضرت ابن عمر رضی اللہ عنہما کے پاس آئی اور عرض کیا کہ اگر میں جوں پاؤں تو اس کو پھینک دوں یا مار دوں؟ آپ نے فرمایا: جوں شکار میں سے نہیں ہے۔ [مصنف ابن ابي شيبه/كتاب الحج/حدیث: 13603]

ایک شخص نے حضرت عطاء سے دریافت کیا کہ جوں میرے اوپر رینگے تو اس کو پھینک دوں؟ آپ نے فرمایا: ہاں، اس شخص نے عرض کیا: میں جو ؤں کو ڈھونڈ کر مار دوں؟ آپ نے فرمایا کہ حالت احرام میں کپڑوں سے جو ؤں کو ڈھونڈ کر مارنے کو ناپسند کیا گیا ہے، راوی کہتے ہیں کہ میں نے عرض کیا کہ چچڑی اور جوں اگر میرے اوپر رینگے تو کیا کروں؟ آپ نے فرمایا اس کو پھینک کر دور کر دے تجھ پر کوئی جرمانہ نہیں ہے۔ [مصنف ابن ابي شيبه/كتاب الحج/حدیث: 13604]

حضرت عکرمہ بن خالد المخزومی سے دریافت کیا گیا کہ اگر محرم کپڑوں پر جو ؤیں دیکھے تو؟ آپ نے فرمایا: اس کو آرام سے پکڑ کر پھینک دے لیکن خود جو ؤیں تلاش نہ کرے۔ [مصنف ابن ابي شيبه/كتاب الحج/حدیث: 13605]

حضرت عطاء فرماتے ہیں کہ اگر محرم چاہے تو اپنے اوپر سے جوں پھینک دے۔ [مصنف ابن ابي شيبه/كتاب الحج/حدیث: 13606]

حضرت معتمر کے والد فرماتے ہیں کہ میری ساتھ چیچڑی چمٹ گئی میں حالت احرام میں تھا، میں نے حضرت طلق بن حبیب سے دریافت کیا؟ آپ نے فرمایا اس کو پھینک دے اللہ تعالیٰ چچڑی کو تجھ سے دور کرے۔ [مصنف ابن ابي شيبه/كتاب الحج/حدیث: 13607]