حضرت ابن عباس رضی اللہ عنہما سے مروی ہے کہلا رَفَثَ سے مراد جماع ہے اور وَ لَا فُسُوْقَ سے مراد دوسرے گناہ کے کام اور وَ لَا جِدَالَ فِی الْحَجِّ سے مراد یہ ہے کہ تو اپنے ساتھی سے اتنا بحث و مباحثہ کرے کہ اس کو غصہ آجائے۔ [مصنف ابن ابي شيبه/كتاب الحج/حدیث: 13701]

حضرت مجاہد سے مروی ہے کہ وَ لَا جِدَالَ فِی الْحَجِّ سے مراد یہ ہے کہ ذی الحجہ کے مہینے میں حج کیا جائے اس مہینے سے مؤخر نہ کیا جائے، حج میں کوئی شک نہیں ہے کیونکہ جاہلیت میں لوگ ذی الحجہ کے علاوہ دوسرے مہینوں میں کرتے تھے۔ [مصنف ابن ابي شيبه/كتاب الحج/حدیث: 13702]

حضرت جابر بن زید فرماتے ہیں وَ لَا جِدَالَ فِی الْحَجِّ سے مراد یہ ہے کہ اپنے ساتھی سے اتنا بحث و مباحثہ نہ کر کہ اس کو غصہ آجائے۔ [مصنف ابن ابي شيبه/كتاب الحج/حدیث: 13703]

حضرت ابراہیم فرماتے ہیں الرفث سے مراد عورتوں کے پاس آنا، الفسوق سے مراد گالی نکالنا اور والجدال سے مراد اپنے ساتھی سے بحث و مباحثہ کرنا ہے۔ [مصنف ابن ابي شيبه/كتاب الحج/حدیث: 13704]

حضرت ضحاک فرماتے ہیں کہ الرفث سے مراد جماع کرنا، الفسوق سے مراد دوسرے گناہ اور والجدال سے مراد اپنے ساتھی سے جھگڑا اور مناظرہ کرنا جس سے اس کو غصہ آجائے۔ [مصنف ابن ابي شيبه/كتاب الحج/حدیث: 13705]

حضرت عکرمہ فرماتے ہیں الرفث سے مراد جماع، الفسوق سے مراد دوسرے گناہ اور والجدال سے مراد جھگڑا و مباحثہ کرنا ہے۔ [مصنف ابن ابي شيبه/كتاب الحج/حدیث: 13706]

حضرت ابن عباس رضی اللہ عنہما فرماتے ہیں کہ الرفث سے مراد جماع کرنا ہے لیکن اللہ تعالیٰ نے اس کو کنایہ کے ساتھ بیان کیا۔ [مصنف ابن ابي شيبه/كتاب الحج/حدیث: 13707]

حضرت حسن فرماتے ہیں کہ الرفث سے مراد جماع کرنا، والفسوق سے مراد گالی دینا اور والجدال سے مراد حج میں اختلاف اور مناظرہ کرنا۔ [مصنف ابن ابي شيبه/كتاب الحج/حدیث: 13708]

حضرت عطاء بن یسار سے اللہ تعالیٰ کے ارشاد { فَلَا رَفَثَ وَ لَا فُسُوْقَ وَ لَا جِدَالَ فِی الْحَجِّ } کے متعلق دریافت کیا گیا؟ آپ نے فرمایا الرفث سے مراد جماع کرنا، والفسوق سے مراد دوسرے گناہ اور والجدال سے مراد گالی دینا ہے۔ [مصنف ابن ابي شيبه/كتاب الحج/حدیث: 13709]

حضرت عطاء فرماتے ہیں کہ الرفث سے مراد بیوی سے شرعی ملاقات کرنا، والفسوق سے مراد دوسرے گناہ اور والجدال سے مراد یہ ہے کہ تو اپنے ساتھی سے اتنا بحث مباحثہ کرے کہ جس سے اس کو غصہ آجائے اور وہ تجھے غصہ دلا دے۔ [مصنف ابن ابي شيبه/كتاب الحج/حدیث: 13710]