حضرت مجاہد فرماتے ہیں کہ بعض اوقات چیونٹی میرے پیٹ پر کاٹ لیتی ہے تو میں اس کے سر کو پکڑ کر کچل دیتا ہوں اور اس کا باقی حصہ میرے پیٹ پر رہتا ہے۔ [مصنف ابن ابي شيبه/كتاب الحج/حدیث: 13738]

حضرت عطاء سے دریافت کیا گیا کہ ایک شخص نے بہت سی چیونٹیاں مار ڈالیں لیکن ان کی تعداد کا علم نہیں ہے؟ آپ نے فرمایا وہ بہت سی کھجوریں صدقہ کرے۔ [مصنف ابن ابي شيبه/كتاب الحج/حدیث: 13739]

حضرت سعید بن جبیر سے دریافت کیا گیا کہ محرم اگر کافی زیادہ چیونٹیاں مار ڈالے؟ آپ نے فرمایا وہ صدقہ کرے۔ [مصنف ابن ابي شيبه/كتاب الحج/حدیث: 13740]

حضرت طاؤس سے دریافت کیا کہ میں نے احرام باندھا اور پھر بہت سی چیونٹیاں مار ڈالیں؟ آپ نے فرمایا گیہوں کی کچھ مٹھیاں بھر کر صدقہ کر دے۔ [مصنف ابن ابي شيبه/كتاب الحج/حدیث: 13741]

حضرت عطاء سے دریافت کیا گیا کہ محرم اگر چیونٹی مار ڈالے؟ آپ نے فرمایا کچھ کھلا دے۔ [مصنف ابن ابي شيبه/كتاب الحج/حدیث: 13742]

حضرت طاؤس سے دریافت کیا گیا حرم میں چیونٹی کو مارنا کیسا ہے؟ آپ نے فرمایا اگر وہ تجھے تکلیف دے تو کوئی حرج نہیں۔ [مصنف ابن ابي شيبه/كتاب الحج/حدیث: 13743]

حضرت قاسم، حضرت مجاہد، حضرت سالم، حضرت عطاء اور حضرت طاؤس سے چیونٹی، ٹڈی اور چھپکلی کے متعلق دریافت کیا گیا؟ سب حضرات نے فرمایا: اگر غلطی سے مار دے تو کوئی حرج نہیں اور اگر جان بوجھ کر مار ڈالے تو ایک مٹھی کھانا دے دے اور حضرت عامر فرماتے ہیں جان بوجھ کر مارے یا غلطی سے ایک مٹھی کھانا دینا پڑے گا۔ [مصنف ابن ابي شيبه/كتاب الحج/حدیث: 13744]