حضرت عثمان سے مروی ہے کہ نبی کریم صلی اللہ علیہ وآلہ وسلم سے ایک شخص نے شکایت کی کہ وہ محرم ہے اور اس کی آنکھوں میں تکلیف ہے، اس کی آنکھوں پر ایلوے کی پٹی باندھی۔ [مصنف ابن ابي شيبه/كتاب الحج/حدیث: 13750]

حضرت نافع سے مروی ہے کہ حضرت ابن عمر رضی اللہ عنہما نے اس طرح کیا۔ [مصنف ابن ابي شيبه/كتاب الحج/حدیث: 13751]

حضرت ابن عمر رضی اللہ عنہما کی آنکھ میں حالت احرام میں تکلیف ہوئی تو آپ نے اس میں ایلوے کے عرق کے کچھ قطرے ڈالے۔ [مصنف ابن ابي شيبه/كتاب الحج/حدیث: 13752]

حضرت علقمہ فرماتے ہیں حالت احرام میں آنکھوں میں ایلوے کا عرق لگانے میں کوئی حرج نہیں۔ [مصنف ابن ابي شيبه/كتاب الحج/حدیث: 13753]

حضرت شمیسہ الازدیہ فرماتی ہیں کہ میں حالت احرام میں حضرت عائشہ رضی اللہ عنہا کی خدمت میں حاضر ہوئی میری آنکھوں میں تکلیف تھی، حضرت عائشہ رضی اللہ عنہا نے فرمایا: قریب آؤ تمہاری آنکھوں میں سرمہ (دوائی) لگاؤں ان کے پاس ایک سپی نما خول تھا جس میں ایلوا موجود تھا، میں نے ان کی بات نہ مانی اور انکار کردیا پھر بعد میں مجھے سخت ندامت ہوئی کہ کاش میں اس کو نہ چھوڑتی (اور لگوا لیتی)۔ [مصنف ابن ابي شيبه/كتاب الحج/حدیث: 13754]

حضرت سعید بن المسیب فرماتے ہیں کہ اس کے لگانے میں کوئی حرج نہیں۔ [مصنف ابن ابي شيبه/كتاب الحج/حدیث: 13755]

حضرت عطاء فرماتے ہیں کہ اگر محرم کی آنکھوں میں تکلیف ہو تو وہ ایلوا یا کوئی دوسری دوائی آنکھوں میں لگا لے لیکن ایسا سرمہ نہ لگائے جس میں خوشبو کی آمیزش ہو۔ [مصنف ابن ابي شيبه/كتاب الحج/حدیث: 13756]

حضرت سعید بن زید سے مروی ہے کہ ایک شخص حضرت حسن کی خدمت میں حاضر ہوا اور عرض کیا، اے ابو سعید! محرم آنکھوں میں کیا لگائے؟ حضرت جابر بن زید بھی ان کے ساتھ تشریف فرما تھے، حضرت حسن خاموش رہے، حضرت جابر نے فرمایا نے فرمایا وہ شہد لگائے، حضرت حسن نے آپ کی اس بات کا انکار نہ فرمایا۔ [مصنف ابن ابي شيبه/كتاب الحج/حدیث: 13757]

حضرت قتادہ اور حضرت ابو ہاشم فرماتے ہیں کہ محرم ایلوا، حضض نامی دوائی اور دوسری کڑوی دوائی آنکھوں میں لگا سکتا ہے۔ [مصنف ابن ابي شيبه/كتاب الحج/حدیث: 13758]

حضرت مجاہد محرم کے لیے کالے سرمہ کو ناپسند کرتے تھے، راوی کہتے ہیں کہ میں نے حضرت ابراہیم سے اس کا ذکر فرمایا آپ نے فرمایا: وہ لال سفوف استعمال کرلے۔ [مصنف ابن ابي شيبه/كتاب الحج/حدیث: 13759]