حضرت جابر سے مروی ہے کہ نبی کریم صلی اللہ علیہ وآلہ وسلم بنو عبد المطلب کے پاس تشریف لائے، وہ بیر زم زم سے پانی نکال رہے تھے، بنو عبد المطلب کی پانی نکالنے میں مدد کرو اگر مجھے اس بات کا خوف نہ ہوتا کہ لوگ پانی نکالنے کے لیے مجھے دیکھ کر رش کریں گے تو میں بھی تمہارے ساتھ پانی نکالتا، لوگوں نے پانی نکالا تو آپ صلی اللہ علیہ وآلہ وسلم نے پیا۔ [مصنف ابن ابي شيبه/كتاب الحج/حدیث: 13804]

حضرت عبد اللہ بن عثمان بن خثیم فرماتے ہیں کہ میں نے حضرت سعید بن جبیر کے ساتھ طواف کیا پھر آپ حوض پر تشریف لائے جس میں آب زم زم تھا آپ نے اس میں سے چلو بھر کر پانی پیا۔ [مصنف ابن ابي شيبه/كتاب الحج/حدیث: 13805]

حضرت مجاہد فرماتے ہیں کہ صحابہ کرام اس بات کو پسند کرتے تھے کہ جب وہ بیت اللہ کا طواف ختم کرتے تو آب زم زم پر آتے اور اس میں سے نوش فرماتے۔ [مصنف ابن ابي شيبه/كتاب الحج/حدیث: 13806]

حضرت بکر فرماتے ہیں کہ مجھے پسند ہے کہ کوئی شخص آب زم زم میں سے خود بھی پیے اور اگر طاقت رکھے تو دوسروں کو بھی پلائے۔ [مصنف ابن ابي شيبه/كتاب الحج/حدیث: 13807]

حضرت نافع فرماتے ہیں کہ میں نے حضرت ابن عمر رضی اللہ عنہما کو کبھی نہیں دیکھا کہ طواف کے بعد انہوں نے کبھی زم زم پیا ہو۔ [مصنف ابن ابي شيبه/كتاب الحج/حدیث: 13808]

حضرت خالد بن ابوبکر سے مروی ہے کہ حضرت سالم کو طواف کے بعد زم زم کا پانی پیتے نہیں دیکھا۔ [مصنف ابن ابي شيبه/كتاب الحج/حدیث: 13809]