حضرت عکرمہ فرماتے ہیں کہ قرآن پاک کی آیت { لَیْسَ عَلَیْکُمْ جُنَاحٌ اَنْ تَبْتَغُوْا فَضْلاً مِّنْ رَّبِّکُمْ } حج کے زمانے کے متعلق نازل ہوئی ہے۔ [مصنف ابن ابي شيبه/كتاب الحج/حدیث: 13847]

حضرت عبید اللہ بن ابو یزید اور حضرت ابن الزبیر سے بھی یہی مروی ہے۔ [مصنف ابن ابي شيبه/كتاب الحج/حدیث: 13848]

حضرت ابن عمر رضی اللہ عنہما سے دریافت کیا گیا کہ کوئی شخص حج کے لیے جائے اور ساتھ سامان تجارت لے جائے؟ آپ نے فرمایا کوئی حرج نہیں پھر یہ آیت تلاوت فرمائی، { یَبْتَغُوْنَ فَضْلًا مِّنْ رَّبِّھِمْ وَ رِضْوَانًا }۔ وہ اللہ تعالیٰ کے فضل اور رضوان کو تلاش کرتے ہیں۔ [مصنف ابن ابي شيبه/كتاب الحج/حدیث: 13850]

حضرت حسن فرماتے ہیں کہ اس میں کوئی حرج نہیں کہ حاجی انپے ساتھ سامان تجارت رکھے، اور حضرت محمد فرماتے ہیں کہ بیشک اللہ تعالیٰ اس بات پر قادر ہے کہ اس شخص کے لیے (حج اور تجارت) دونوں کو جمع کر دے۔ [مصنف ابن ابي شيبه/كتاب الحج/حدیث: 13851]

حضرت مجاہد فرماتے ہیں کہ صحابہ کرام دوران حج تجارت نہ کرتے تھے، یہاں تک کہ قرآن پاک کی آیت { لَیْسَ عَلَیْکُمْ جُنَاحٌ اَنْ تَبْتَغُوْا فَضْلاً مِّنْ رَّبِّکُمْ } نازل ہوئی (تو تجارت شروع کردی)۔ [مصنف ابن ابي شيبه/كتاب الحج/حدیث: 13853]

حضرت ابن عباس رضی اللہ عنہما فرماتے ہیں صحابہ کرام ایام حج میں خریدو فروخت نہ کرتے تھے، یہاں تک کہ قرآن پاک کی آیت { لَیْسَ عَلَیْکُمْ جُنَاحٌ اَنْ تَبْتَغُوْا فَضْلاً مِّنْ رَّبِّکُمْ } نازل ہوئی تو خریدو فروخت شروع کردی۔ [مصنف ابن ابي شيبه/كتاب الحج/حدیث: 13854]

حضرت مجاہد فرماتے ہیں کہ { لَیْسَ عَلَیْکُمْ جُنَاحٌ اَنْ تَبْتَغُوْا فَضْلاً مِّنْ رَّبِّکُمْ } نازل ہوئی تو حج کے زمانے میں ان کے لیے تجارت حلال کردی گئی، کیونکہ زمانہ جاہلیت میں منیٰ اور عرفات میں خریدو فروخت نہ کرتے تھے۔ [مصنف ابن ابي شيبه/كتاب الحج/حدیث: 13855]