حضرت ابن جریج فرماتے ہیں کہ میں نے حضرت عطاء سے عرض کیا اللہ پاک کا ارشاد ہے، { وَالْبُدْنَ جَعَلْنَاہَا لَکُمْ مِنْ شَعَائِرِ اللہِ } البدنہ سے کیا مراد ہے؟ آپ نے فرمایا: اونٹ اور گائے۔ [مصنف ابن ابي شيبه/كتاب الحج/حدیث: 15281]

حضرت سعید بن المسیب فرماتے ہیں کہ اس سے مراد اونٹ اور گائے ہے۔ [مصنف ابن ابي شيبه/كتاب الحج/حدیث: 15282]

حضرت مجاہد فرماتے ہیں البدن صرف اونٹ میں سے ہی ہو۔ [مصنف ابن ابي شيبه/كتاب الحج/حدیث: 15283]

حضرت قاسم بن محمد فرماتے ہیں کہ بکری کو قربانی میں سے شمار نہیں کیا جائے گا، بیشک گائے بھی البدن میں شامل ہے۔ [مصنف ابن ابي شيبه/كتاب الحج/حدیث: 15284]

حضرت عبد الکریم فرماتے ہیں کہ حضرت عطاء اور حضرت حکم کا اس بارے میں اختلاف ہوا، حضرت عطاء فرماتے ہیں کہ گائے اور اونٹ میں سے ہو اور حضرت حکم فرماتے ہیں صرف اونٹ میں سے ہو۔ [مصنف ابن ابي شيبه/كتاب الحج/حدیث: 15285]

حضرت یعقوب سے مروی ہے کہ میرے محلہ کا ایک شخص فوت ہوا اور اس نے وصیت کی کہ اس کی طرف سے بدنہ کی قربانی کی جائے، میں نے حضرت ابن عباس رضی اللہ عنہما سے دریافت کیا کہ گائے ذبح کی جاسکتی ہے؟ آپ نے فرمایا کافی ہوجائے گی، آپ نے پوچھا کہ تو کون سی قوم میں سے ہے؟ میں نے عرض کیا بنو رباح سے، آپ نے فرمایا بنو رباح کے پاس گائے کہاں سے آگئی؟ گائے تو ازد اور قبیلہ عبد قیس کے پاس ہوتی ہیں۔ [مصنف ابن ابي شيبه/كتاب الحج/حدیث: 15287]