حضرت حسن فرماتے ہیں کہ عورت ذی رحم محرم کے ساتھ ہی حج کرے گی۔ [مصنف ابن ابي شيبه/كتاب الحج/حدیث: 15850]

حضرت ابن سیرین فرماتے ہیں کہ عورت ایسی جماعت کے ساتھ جائے جس میں مرد اور خواتین ہوں۔ [مصنف ابن ابي شيبه/كتاب الحج/حدیث: 15851]

حضرت عطاء فرماتے ہیں کہ وہ ایسی جماعت کے ساتھ جائے جس میں مرد وخواتین شامل ہوں، اور عورت ایک سیڑھی لے کر اس پر چڑھ جائے اور مزدور اس کے قریب نہ جائے۔ [مصنف ابن ابي شيبه/كتاب الحج/حدیث: 15852]

اھل الری کی ایک خاتون نے حضرت ابراہیم کو لکھا کہ وہ مالدار ہے اور اس کا شوہر بھی نہیں ہے اور کوئی محرم بھی نہیں ہے اور اس نے آج تک حج بھی نہیں کیا ہوا، حضرت ابراہیم نے اس کو لکھ کر بھیجا کہ: بیشک یہ وہ راستہ ہے جس کے متعلق اللہ تعالیٰ نے فرمایا ہے اور تیرے پاس کوئی محرم بھی نہیں ہے، تو شوہر اور محرم کے سوا ہرگز حج نہ کر۔ [مصنف ابن ابي شيبه/كتاب الحج/حدیث: 15853]

حضرت حسن بن الحسن اس عورت کو رخصت دیتے تھے جس نے حج نہ کیا ہو کہ وہ ایسی عورتوں کے ساتھ چلی جائے جن عورتوں کے ساتھ ان کے محرم ہوں۔ [مصنف ابن ابي شيبه/كتاب الحج/حدیث: 15854]

حضرت ابو سعید سے مروی ہے کہ نبی کریم صلی اللہ علیہ وآلہ وسلم نے ارشاد فرمایا: عورت تین دن یا اس سے زیادہ کا سفر اپنے ماں، باپ، بھائی، شوہر یا محرم کے علاوہ نہ کرے۔ [مصنف ابن ابي شيبه/كتاب الحج/حدیث: 15855]

حضرت عامر سے ایک خاتون نے دریافت کیا کہ میں حج کرنا چاہتی ہوں لیکن میرا شوہر خراسان میں غائب ہے؟ آپ نے فرمایا کہ اگر تیرے پر حج فرض ہوگیا ہے اور کوئی محرم بھی ہے تو کوئی حرج نہیں اس کے ساتھ چلی جا۔ [مصنف ابن ابي شيبه/كتاب الحج/حدیث: 15856]

حضرت طاؤس فرماتے ہیں کہ عورت شوہر یا محرم کے علاوہ کسی اور کے ساتھ حج نہ کرے۔ [مصنف ابن ابي شيبه/كتاب الحج/حدیث: 15857]

حضرت عکرمہ سے دریافت کیا گیا کہ عورت اگر شوہر اور محرم کے بغیر حج کرے؟ آپ نے فرمایا کہ نبی کریم صلی اللہ علیہ وآلہ وسلم نے منع فرمایا ہے کہ عورت تین دن یا اس سے زیادہ کا سفر محرم کے بغیر کرے۔ [مصنف ابن ابي شيبه/كتاب الحج/حدیث: 15858]

حضرت ابن عمر رضی اللہ عنہما سے مروی ہے کہ نبی کریم صلی اللہ علیہ وآلہ وسلم نے ارشاد فرمایا عورت تین دن سے زیادہ کا سفر محرم کے بغیر نہ کرے۔ [مصنف ابن ابي شيبه/كتاب الحج/حدیث: 15859]