حضرت یحییٰ بن ابو اسحاق سے مروی ہے کہ حضرت انس ارشاد فرماتے ہیں کہ انہوں نے سنا رسول اکرم (صلی اللہ علیہ وآلہ وسلم) اس طرح تلبیہ پڑھ رہے تھے کہ لبیک بعمرۃ وحج، (عمرہ کو پہلے ذکر فرمایا)۔ [مصنف ابن ابي شيبه/كتاب الحج/حدیث: 16502]

حضرت حریث بن سلیم فرماتے ہیں کہ میں نے سنا حضرت علی رضی اللہ عنہ نے حج وعمرہ کے لیے ایک ساتھ تلبیہ پڑھا اور عمرہ سے ابتدا فرمائی، حضرت عثمان نے آپ سے فرمایا کہ آپ ان لوگوں میں سے ہیں جن کی طرف دیکھا جاتا ہے (جن کے عمل کو حجت سمجھا جاتا ہے) حضرت علی رضی اللہ عنہ نے ان سے فرمایا کہ آپ بھی انہی میں سے ہیں جن کی طرف دیکھا جاتا ہے۔ [مصنف ابن ابي شيبه/كتاب الحج/حدیث: 16503]

حضرت یحییٰ بن ابو اسحاق سے مروی ہے کہ حضرت انس ارشاد فرماتے ہیں کہ انہوں نے سنا رسول اکرم (صلی اللہ علیہ وآلہ وسلم) اس طرح تلبیہ پڑھ رہے تھے کہ لَبَّیْکَ بِعُمْرَۃٍ وَحَجٍّ (عمرہ کو پہلے ذکر فرمایا)۔ [مصنف ابن ابي شيبه/كتاب الحج/حدیث: 16504]

حضرت منصور فرماتے ہیں کہ میں نے حضرت ابراہیم اور حضرت مجاہد سے دریافت کیا کہ آدمی اگر حج وعمرہ کے لیے ایک ساتھ تلبیہ پڑھے؟ حضرت مجاہد نے فرمایا کہ وہ عمرہ سے ابتدا کرے، اور حضرت ابراہیم نے فرمایا اس کی نیت اس کے لیے کافی ہوجائے گی۔ [مصنف ابن ابي شيبه/كتاب الحج/حدیث: 16505]