حضرت ابن عمر رضی اللہ عنہما فرماتے ہیں کہ میں کوئی سوئی پوری کی پوری اپنے سر میں چبھو دوں مجھے اس بات سے زیادہ پسند ہے کہ کوئی غیر محرم عورت میرے سر کو چومے۔ [مصنف ابن ابي شيبه/كتاب النكاح/حدیث: 18208]

حضرت ابراہیم رحمہ اللہ فرماتے ہیں کہ کسی آدمی کا دماغ جوؤں سے بھر جائے، یہ اس سے بہتر ہے کہ کوئی غیر محرم عورت اس کے بالوں کی مینڈیاں بنائے۔ انہوں نے ذکر کیا کہ ایک مرتبہ ایک عورت ایک آدمی کی مینڈیاں بنا رہی تھی تو اس نے اس کا بوسہ لے لیا تھا۔ [مصنف ابن ابي شيبه/كتاب النكاح/حدیث: 18209]

حضرت حسن رحمہ اللہ فرماتے ہیں کہ غیر محرم عورت کے لئے آدمی کا سردھونا درست نہیں۔ [مصنف ابن ابي شيبه/كتاب النكاح/حدیث: 18210]

حضرت معقل بن یسار رحمہ اللہ فرماتے ہیں کہ تم میں کوئی شخص ایک سوئی پوری میرے سر میں چبھو دے یہ مجھے اس بات سے زیادہ پسند ہے کہ کوئی غیر محرم عورت میرے سر کو دھوئے۔ [مصنف ابن ابي شيبه/كتاب النكاح/حدیث: 18211]

حضرت شعبہ رحمہ اللہ فرماتے ہیں کہ میں نے حضرت قتادہ رحمہ اللہ کو فرماتے ہوئے سنا کہ میں نے ایک عورت کے ساتھ مکہ تک کا سفر کیا، وہ میرا سر دھویا کرتی تھی یا فرمایا کہ وہ میری چٹیاں بنایا کرتی تھی۔ [مصنف ابن ابي شيبه/كتاب النكاح/حدیث: 18212]

حضرت ابو موسیٰ رحمہ اللہ فرماتے ہیں کہ میں اپنی قوم کی ایک عورت کے پاس آیا اس نے میرے کپڑے دھوئے اور میرے سر میں کنگھی کی۔ [مصنف ابن ابي شيبه/كتاب النكاح/حدیث: 18213]