حضرت ابو ہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”ایک آدمی نے کہا: ”میں آج رات صدقہ کروں گا۔“ چنانچہ وہ اپنا صدقہ لے کر نکلا اور اسے ایک زانیہ کے ہاتھ میں رکھ دیا، صبح لوگ باتیں کرنے لگے کہ آج رات ایک زانیہ کو صدقہ دیا گیا ہے۔ اس آدمی نے کہا: ”اے اللہ! تو ہر حالت میں قابلِ تعریف ہے، میں زانیہ کو صدقہ دے بیٹھا ہوں، آج میں ضرور صدقہ کروں گا۔“ پھر وہ اپنا صدقہ لے کر نکلا اور اسے ایک مالدار کو دے دیا، صبح لوگ باتیں کرنے لگے کہ رات مالدار کو صدقہ دیا گیا ہے۔ اس نے کہا: ”اے اللہ! قابلِ تعریف تو ہی ہے، میرا صدقہ غنی کو ملا، میں ضرور صدقہ کروں گا۔“ پھر وہ اپنا صدقہ لے کر نکلا تو اسے ایک چور کے ہاتھ میں رکھ دیا، لوگ صبح باتیں کرنے لگے کہ چور کو صدقہ دیا گیا، تو اس نے کہا: ”اے اللہ! تیرے لیے ہی حمد ہے، صدقہ زانیہ، غنی اور چور کو ملا۔“ پھر اس کے پاس کوئی (خواب میں) آیا اور اسے بتایا گیا: ”رہا تیرا صدقہ تو وہ قبول ہو چکا ہے؛ رہی زانیہ تو شاید وہ اس کے سبب زنا سے بچ جائے، اور شاید مالدار سبق حاصل کرے اور اللہ نے اسے جو کچھ دیا ہے اس میں سے صدقہ کرے، اور شاید چور اس کے باعث اپنی چوری سے باز آ جائے۔““ [صحيح مسلم/كِتَاب الزَّكَاةِ/حدیث: 2362]