حضرت ابن عمر رضی اللہ عنہما رحمہ اللہ کی تربیت میں ایک یتیم بچی تھی، آپ نے اس کی شادی کردی اور اس کا مال بطور مضاربت اس کے شوہر کو دے دیا۔ [مصنف ابن ابي شيبه/كتاب البيوع والأقضية/حدیث: 22701]

حضرت حمید اپنے دادا سے روایت کرتے ہیں کہ حضرت عمر رضی اللہ عنہ نے ان کے پاس یتیم کا مال بطور مضاربت بھیجا۔ انہوں نے اس سے تجارت کی اور نفع کمایا، پھر انہوں نے منافع کو تقسیم فرمایا اور اس معاملے الگ الگ ہوگئے۔ [مصنف ابن ابي شيبه/كتاب البيوع والأقضية/حدیث: 22702]

حضرت عمر رضی اللہ عنہ کے پاس یتیم کا مال موجود تھا، آپ رضی اللہ عنہ نے وہ مال بطور مضاربت بحری تجارت میں دے دیا۔ [مصنف ابن ابي شيبه/كتاب البيوع والأقضية/حدیث: 22703]

حضرت حسن رضی اللہ عنہ یتیم کے مال کے والی تھے، انہوں نے وہ مال اس کے مولیٰ (سرپرست) کو (بطور مضاربت) دے دیا۔ [مصنف ابن ابي شيبه/كتاب البيوع والأقضية/حدیث: 22704]

حضرت ابراہیم رحمہ اللہ فرماتے ہیں کہ اگر وصی یتیم کے مال کو کاروبار میں لگائے تو اس میں کوئی حرج نہیں، راوی کہتے ہیں کہ میں نے عرض کیا کہ اگر مال ہلاک ہوجائے تو ضامن ہوگا؟ آپ رحمہ اللہ نے فرمایا کہ نہیں۔ [مصنف ابن ابي شيبه/كتاب البيوع والأقضية/حدیث: 22705]

حضرت ابراہیم رحمہ اللہ فرماتے ہیں کہ اگر وصی یتیم کے مال کو کاروبار میں لگائے تو کوئی حرج نہیں۔ [مصنف ابن ابي شيبه/كتاب البيوع والأقضية/حدیث: 22706]

حضرت حسن رحمہ اللہ یتیم کے مال کو بطور مضاربت دینے کو ناپسند سمجھتے تھے،۔ اور فرماتے تھے کہ اس مال کا ضامن ہوجا، اس کو بحری یا زمینی تجارت میں نہ لگا۔ [مصنف ابن ابي شيبه/كتاب البيوع والأقضية/حدیث: 22707]

حضرت مجاہد یتیم کے مال کے متعلق فرماتے ہیں کہ اگر اس کو تجارت میں لگا کر نفع کما لو تو وہ اس کا ہے، اور اگر نقصان ہوجائے تو ضامن ہوگا اور اگر وہ پڑا پڑا ہلاک ہوجائے تو ضمان لازم نہ آئے گا۔ [مصنف ابن ابي شيبه/كتاب البيوع والأقضية/حدیث: 22708]

حضرت قاسم رحمہ اللہ فرماتے ہیں کہ ہم کچھ یتیم حضرت عائشہ رضی اللہ عنہا کی تربیت میں تھے، آپ رضی اللہ عنہا ہمارے مالوں کو پاکیزہ رکھتی تھیں اور تجارت میں لگاتی تھیں۔ [مصنف ابن ابي شيبه/كتاب البيوع والأقضية/حدیث: 22709]

حضرت ضحاک رحمہ اللہ فرماتے ہیں کہ اللہ تعالیٰ کے ارشاد { وَلاَ تَقْرَبُوا مَالَ الْیَتِیمِ إلاَّ بِاَلَّتِی ہِیَ أَحْسَنُ } کا مطلب یہ ہے کہ یتیم کے لئے اس مال میں (روزگار، تجارت) تلاش کیا جائے گا۔ [مصنف ابن ابي شيبه/كتاب البيوع والأقضية/حدیث: 22710]