حضرت نعمان بن سالم فرماتے ہیں کہ حضرت عبد اللہ بن عمرو رضی اللہ عنہ کے پاس ایک آدمی کو چھینک آئی تو آپ نے اسے یرحمک اللہ کہہ کر دعا دی، پھر اسے دوبارہ چھینک آئی تو آپ نے پھر یرحمک اللہ کہا، پھر اسے تیسری بار چھینک آئی تو آپ نے فرمایا: بیشک تو زکام میں مبتلا ہے۔ [مصنف ابن ابي شيبه/ كتاب الأدب/حدیث: 27658]

حضرت حارث فرماتے ہیں کہ حضرت علی رضی اللہ عنہ نے ارشاد فرمایا: تم چھینکنے والے کو یرحمک اللہ کہو جب وہ تمہارے سامنے تین مرتبہ چھینکے اگر وہ زیادہ چھینکتا ہے تو یہ بیماری ہے۔ [مصنف ابن ابي شيبه/ كتاب الأدب/حدیث: 27659]

حضرت ایاس بن سلمہ فرماتے ہیں کہ ان کے والد حضرت سلمہ بن اکوع نے ارشاد فرمایا: کہ ایک آدمی کو نبی کریم صلی اللہ علیہ وآلہ وسلم کے پاس چھینک آئی تو آپ صلی اللہ علیہ وآلہ وسلم نے فرمایا: یرحمک اللہ، پھر دوسری مرتبہ اسے پھر چھینک آئی تو آپ صلی اللہ علیہ وآلہ وسلم نے فرمایا: یہ تو زکام میں مبتلا ہے۔ [مصنف ابن ابي شيبه/ كتاب الأدب/حدیث: 27660]

حضرت مصعب بن عبد الرحمن بن ذؤیب فرماتے ہیں کہ ایک آدمی کو حضرت ابن زیبر کے پاس چھینک آئی تو آپ نے اسے یرحمک اللہ کہہ کر دعا دی۔ اسے پھر چھینک آئی، تو آپ نے دوبارہ یرحمک اللہ کہہ کر دعا دی اسے تیسری مرتبہ پھر چھینک آئی تو آپ نے اسے یرحمک اللہ کہہ کر دعا دی، پھر جب چوتھی مرتبہ اسے چھینک آئی تو حضرت عبد اللہ بن زبیر نے اس سے فرمایا: بیشک تم تو زکام میں مبتلا ہو تم اپنی ناک صاف کرو۔ [مصنف ابن ابي شيبه/ كتاب الأدب/حدیث: 27661]

امام شعبی فرماتے ہیں کہ حضرت عمرو بن العاص نے ارشاد فرمایا: جب تم میں کسی کو تین مرتبہ چھینک آئے تو تم اسے یرحمک اللہ کہہ کر دعا دو، اور اگر زیادہ مرتبہ آئے تو اسے یرحمک اللہ مت کہو کیونکہ یہ تو بیماری ہے جو اس کے سر سے نکلتی ہے۔ [مصنف ابن ابي شيبه/ كتاب الأدب/حدیث: 27662]

حضرت محمد بن جعفر بن زبیر فرماتے ہیں کہ ایک آدمی کو نبی کریم صلی اللہ علیہ وآلہ وسلم کے پاس چھینک آئی تو آپ صلی اللہ علیہ وآلہ وسلم نے اسے یرحمک اللہ کہہ کر دعا دی پھر اسے چھینک آئی تو آپ صلی اللہ علیہ وآلہ وسلم نے یرحمک اللہ کہہ کر دعا دی، اسے پھر چھینک آئی تو آپ صلی اللہ علیہ وآلہ وسلم نے یرحمک اللہ کہہ کر دعا دی، پھر جب چوتھی مرتبہ اسے چھینک آئی تو نبی کریم صلی اللہ علیہ وآلہ وسلم نے اس سے فرمایا: تم تو زکام میں مبتلا ہو، جاؤ جا کر اپنی ناک صاف کرو۔ [مصنف ابن ابي شيبه/ كتاب الأدب/حدیث: 27663]

حضرت ہشام فرماتے ہیں کہ حضرت حسن بصری نے اس شخص کے بارے میں جسے بار بار چھینک آرہی ہو یوں ارشاد فرمایا: کہ تم اسے ایک مرتبہ ہی یرحمک اللہ کہہ دو۔ [مصنف ابن ابي شيبه/ كتاب الأدب/حدیث: 27664]

حضرت منصور فرماتے ہیں کہ حضر ت مجاہد نے ارشاد فرمایا: ایسے شخص کو ایک مرتبہ یرحمک اللہ کہہ دینا کافی ہے۔ [مصنف ابن ابي شيبه/ كتاب الأدب/حدیث: 27665]