حضرت وائل بن عمر فرماتے ہیں کہ رسول اللہ صلی اللہ علیہ وآلہ وسلم کے زمانے میں ایک عورت کو بدکاری کرنے پر مجبور کیا گیا تھا تو آپ صلی اللہ علیہ وآلہ وسلم نے اس عورت سے سزا ختم کردی۔ [مصنف ابن ابي شيبه/كتاب الحدود/حدیث: 30310]

حضرت ابن عمر رضی اللہ عنہما فرماتے ہیں کہ حضرت عمر کے پاس حکومت کی باندیوں میں سے چند باندیاں لائی گئیں جن کو حکومت کے غلاموں میں سے چند غلاموں نے بدکاری پر مجبور کیا تھا تو آپ نے ان غلاموں کو کوڑے مارے اور ان باندیوں کو نہیں مارا۔ [مصنف ابن ابي شيبه/كتاب الحدود/حدیث: 30311]

حضرت نافع فرماتے ہیں کہ ایک آدمی نے کسی گھر والوں کی دعوت کی پس اس نے ان میں سے ایک عورت کو بدکاری پر مجبور کیا، یہ معاملہ حضرت ابوبکر کی خدمت میں پیش کیا گیا تو آپ نے اس شخص کو کوڑے لگائے اور اس کو جلاوطن کردیا اور آپ نے اس عورت کو کوڑے نہں د مارے۔ [مصنف ابن ابي شيبه/كتاب الحدود/حدیث: 30312]

حضرت حجاج فرماتے ہیں کہ ایک حبشی نے اپنے میں سے کسی عورت کو بدکاری پر مجبور کیا تو حضرت عمر بن عبدالعزیز نے اس پر حد قائم فرمائی۔ اور آپ نے اس عورت کو اس کی ملکیت پہ قدرت دے دی۔ [مصنف ابن ابي شيبه/كتاب الحدود/حدیث: 30313]

حضرت اشعث فرماتے ہیں کہ حضرت زھری، حضرت شعبی اور حضرت حسن بصری ان سب حضرات نے ارشاد فرمایا: بدکاری پر مجبور کی گئی عورت پر حد نہیں جاری ہوگی۔ [مصنف ابن ابي شيبه/كتاب الحدود/حدیث: 30314]

حضرت اشعث فرماتے ہیں کہ حضرت حسن بصری اور زھری نے ارشاد فرمایا: بدکاری پر مجبور کی گئی عورت پر حد جاری نہیں ہوگی۔ [مصنف ابن ابي شيبه/كتاب الحدود/حدیث: 30315]

حضرت ابو حرہ فرماتے ہیں کہ حضرت حسن بصری نے ارشاد فرمایا: ایک غلام نے کسی عورت کو بدکاری پر مجبور کیا اور اس نے اس سے وطی کرلی، پھر وہ دونوں جھگڑا لے کر حضرت حسن بصری کی خدمت میں آئے اس حال میں کہ آپ ان دنوں قاضی تھے پس آپ نے اس غلام پر حد لگائی اور اس غلام کا عورت کے حق میں فیصلہ دے دیا۔ [مصنف ابن ابي شيبه/كتاب الحدود/حدیث: 30316]

حضرت شعبہ فرماتے ہیں کہ میں نے حضرت حکم اور حضرت حماد سے ایک غلام کے متعلق دریافت کیا جس نے ایک لونڈی کی بکارت زائل کردی تھی؟ ان دونوں حضرات نے فرمایا: اس پر حد جاری ہوگی اور اس پر مہر لازم نہیں ہوگا۔ [مصنف ابن ابي شيبه/كتاب الحدود/حدیث: 30317]