حضرت ابن عباس رضی اللہ عنہما اللہ تعالیٰ کے اس قول ”پس جب پھونک ماری جائے گی صور میں“، فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: میں کیسے خوش رہوں؟ حالانکہ صور والے نے صور کو منہ میں ڈال لیا ہے، اور اپنی پیشانی موڑ لی ہے، غور سے سن رہا ہے کہ کب حکم دیا جائے کہ صور پھونک دو؟! تو آپ صلی اللہ علیہ وآلہ وسلم کے صحابہ نے فرمایا: تو ہم کیسے دعا مانگیں؟ آپ صلی اللہ علیہ وآلہ وسلم نے ارشاد فرمایا: تم یہ کلمات پڑھا کرو، ہمیں اللہ کافی ہے، اور وہ اچھا کارساز ہے، اور ہم نے اللہ پر ہی بھروسہ کیا۔ [مصنف ابن ابي شيبه/كتاب الدعاء/حدیث: 31566]

حضرت شعبی فرماتے ہیں کہ حضرت عبد اللہ بن عمرو رضی اللہ عنہ نے ارشاد فرمایا: کہ جب حضرت ابراہیم کو آگ میں ڈالا گیا تو انہوں نے یہ کلمات پڑھے: ہمیں اللہ کافی ہے اور وہ اچھا سازگار ہے۔ [مصنف ابن ابي شيبه/كتاب الدعاء/حدیث: 31567]

حضرت ابو سنان فرماتے ہیں کہ حضرت سعید بن جبیر نے ارشادفرمایا: اللہ پر بھروسہ کرنا ایمان کی بنیاد ہے۔ [مصنف ابن ابي شيبه/كتاب الدعاء/حدیث: 31568]