حضرت مکحول فرماتے ہیں کہ جب نبی صلی اللہ علیہ وآلہ وسلم بیت اللہ کو دیکھتے تو یوں دعا فرماتے: اے اللہ! تو اس گھر کی عزت، عظمت اور ہیبت میں اضافہ فرما، اور جو شخص اس کا حج یا عمرہ کرے اس کی عزت، عظمت، اکرام اور نیکی میں بھی اضافہ فرما۔ [مصنف ابن ابي شيبه/كتاب الدعاء/حدیث: 31603]

حضرت محمد بن سعید فرماتے ہیں کہ حضرت سعید بن المسیب جب کعبہ کی مسجد میں داخل ہوتے اور بیت اللہ کی طرف دیکھتے تو یہ دعا پڑھتے: اے اللہ! تو سلامتی والا ہے، اور تجھ ہی سے سلامتی ہے، اے ہمارے رب! تو ہمیں سلامتی کا تحفہ دے۔ [مصنف ابن ابي شيبه/كتاب الدعاء/حدیث: 31604]

حضرت شعبی ارشاد فرماتے ہیں جب تو پہلی مرتبہ مکہ میں داخل ہو تو حجر اسود پر جا کر اللہ کی حمد کر آسانی پر اور آرام سے پہنچنے پر۔ [مصنف ابن ابي شيبه/كتاب الدعاء/حدیث: 31605]

حضرت سعید فرماتے ہیں کہ حضرت عمر بن خطاب جب بیت المقدس میں داخل ہوتے تو یوں دعا پڑھتے: اے اللہ! تو سلامتی والا ہے، اور تجھ ہی سے سلامتی ہے، ہمارے رب! تو ہمیں سلامتی کا تحفہ دے۔ [مصنف ابن ابي شيبه/كتاب الدعاء/حدیث: 31606]