یسار بن ابی کرب حضرت شریح سے روایت کرتے ہیں کہ انہوں نے ایک آدمی کے بارے میں فیصلہ کیا تھا جس نے کسی کے لئے اپنے مال کے ایک غیر متعین حصّے کی وصیت کی تھی اور مال کی تحدید نہیں کی تھی، آپ نے فرمایا: مال کے حصّے بنا لیے جائیں اور جس کے لئے وصیت کی گئی ہے اس کو بھی ایک حصّہ دے دیا جائے۔ [مصنف ابن ابي شيبه/كتاب الوصايا/حدیث: 32838]

سفیان ایک خراسانی کے حوالے سے روایت کرتے ہیں کہ حضرت عکرمہ نے فرمایا: اس آدمی کو کچھ نہیں ملے گا کیونکہ یہ مجہول وصیت ہے۔ [مصنف ابن ابي شيبه/كتاب الوصايا/حدیث: 32839]

محمد بن صہیب روایت کرتے ہیں کہ حضرت عکرمہ نے اس آدمی کے بارے میں فرمایا جس نے کسی کے لئے اپنے مال کے ایک حصّے کی وصیت کی کہ اس وصیت کی کوئی وقعت نہیں کیونکہ اس نے مال کی مقدار بیان نہیں کی۔ [مصنف ابن ابي شيبه/كتاب الوصايا/حدیث: 32840]

ایوب روایت کرتے ہیں کہ حضرت ایاس بن معاویہ نے فرمایا عرب کہا کرتے تھے کہ اس آدمی کو چھٹا حصّہ ملے گا۔ [مصنف ابن ابي شيبه/كتاب الوصايا/حدیث: 32842]

ھُزیل سے روایت ہے کہ ایک آدمی نے کسی کے لئے اپنے مال کے ایک حصّے کی وصیت کردی اور مقدار بیان نہیں کی تو حضرت عبد اللہ رضی اللہ عنہ نے فرمایا اس کے لئے چھٹا حصّہ ہے۔ [مصنف ابن ابي شيبه/كتاب الوصايا/حدیث: 32843]

حُمید سے روایت ہے کہ عدی نے حضرت ایاس بن معاویہ سے اس بارے میں سوال کیا تو انہوں نے فرمایا ”حصّے“ سے مراد اہل عرب کے محاورات میں چھٹا حصّہ ہوتا ہے۔ [مصنف ابن ابي شيبه/كتاب الوصايا/حدیث: 32844]