حضرت عمر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جو شخص چاہتا ہے کہ قرآن پاک کو تر و تازہ پڑھے جیسا کہ وہ نازل کیا گیا ہے پس اس کو چاہیے کہ و ہ ابن ام عبد کی قراءت پر اس کو پڑھے۔ [مصنف ابن ابي شيبه/كتاب الفضائل/حدیث: 34409]

حضرت شقیق رحمہ اللہ فرماتے ہیں کہ حضرت حذیفہ رضی اللہ عنہ نے ارشاد فرمایا: تحقیق محمد 5 کے خوش قسمت اصحاب جانتے ہیں کہ حضرت عبد اللہ بن مسعود رضی اللہ عنہ قیامت کے دن مرتبہ میں اللہ کے سب سے زیادہ نزدیک ہوں گے۔ [مصنف ابن ابي شيبه/كتاب الفضائل/حدیث: 34410]

حضرت مالک بن حارث رحمہ اللہ فرماتے ہیں کہ حضرت ابو خالد رحمہ اللہ نے ارشاد فرمایا: کہ میں وفد لے کر حضرت عمر رضی اللہ عنہ کے پاس آیا تو انہوں نے شام والوں کو انعام دینے میں ہم پر فضیلت دی، اس بارے میں ہم نے ان سے پوچھا: تو انہوں نے فرمایا: اے کوفہ والو! کیا تم گھبراتے ہو اس بات سے کہ میں نے انعام دینے میں شام والوں کو تم پر فضیلت دی تمہاری روزی کی وجہ سے۔ تحقیق میں نے ام عبد کے مقابلہ میں خود پر تم کو ترجیح دی ہے۔ [مصنف ابن ابي شيبه/كتاب الفضائل/حدیث: 34411]

حضرت زید بن وھب رحمہ اللہ فرماتے ہیں کہ ایک دن حضرت عمر رضی اللہ عنہ بیٹھے ہوئے تھے کہ حضرت عبد اللہ بن مسعود رضی اللہ عنہ کو سامنے سے آتا ہوا دیکھ کر فرمایا: ”داڑھی والا فقہ سے بھرا ہوا ہے۔“ [مصنف ابن ابي شيبه/كتاب الفضائل/حدیث: 34412]

حضرت ابو اسحاق رحمہ اللہ فرماتے ہیں کہ حضر ت حارثہ بن مضرب رحمہ اللہ نے ارشاد فرمایا: ہم لوگوں کو حضرت عمر رضی اللہ عنہ کا خط پڑھ کر سنایا گیا۔ جس میں لکھا تھا: حمد و صلوۃ کے بعد، پس تحقیق میں نے حضرت عمار بن یاسر رضی اللہ عنہ کو تمہاری طرف امیر بنا کر بھیجا اور حضرت عبد اللہ بن مسعود رضی اللہ عنہ کو استاذ اور وزیر بنا کر۔ یہ دونوں نبی کریم صلی اللہ علیہ وآلہ وسلم کے شریف ساتھیوں میں سے ہیں۔ اور میں نے حضرت ابن ام عبد رضی اللہ عنہ کے معاملہ میں خود پر دوسروں کو ترجیح دے دی۔ [مصنف ابن ابي شيبه/كتاب الفضائل/حدیث: 34413]

حضرت ابو البختری رحمہ اللہ فرماتے ہیں کہ لوگوں نے حضرت علی رضی اللہ عنہ سے عرض کیا: آپ رضی اللہ عنہ ہمیں حضرت عبد اللہ بن مسعود رضی اللہ عنہ کے بارے میں بتلائیے۔ آپ رحمہ اللہ نے فرمایا: انہوں نے قرآن و حدیث کو سیکھا۔ اور ان کو یہ چیز علم کے اعتبار سے کافی تھی۔ [مصنف ابن ابي شيبه/كتاب الفضائل/حدیث: 34414]

حضرت صالح بن حیان رحمہ اللہ فرماتے ہیں حضرت ابن بریدہ رضی اللہ عنہ نے ارشاد فرمایا: قرآن کی اس آیت (قَالُوا لِلَّذِینَ أُوتُوا الْعِلْمَ مَاذَا قَالَ آنِفًا) وہ لوگ پوچھتے ہیں ان لوگوں سے جن کو علم دیا گیا کہ کیا کہا رسول اللہ صلی اللہ علیہ وسلم نے ابھی ابھی؟ اس سے حضرت عبد اللہ بن مسعود رضی اللہ عنہ مراد ہیں۔ [مصنف ابن ابي شيبه/كتاب الفضائل/حدیث: 34415]

حضرت ابراہیم رحمہ اللہ فرماتے ہیں کہ حضرت علقمہ رحمہ اللہ نے ارشاد فرمایا: کہ حضرت عبد اللہ بن مسعود رضی اللہ عنہ چلنے میں، ہدایت اور طریقہ میں نبی کریم صلی اللہ علیہ وآلہ وسلم کے مشابہ تھے۔ [مصنف ابن ابي شيبه/كتاب الفضائل/حدیث: 34416]

حضرت اعمش رحمہ اللہ فرماتے ہیں کہ حضرت حبہ بن جُوین رحمہ اللہ نے ارشاد فرمایا: ہم لوگ حضرت علی رضی اللہ عنہ کے پا س بیٹھے ہوئے تھے اتنے میں ہم نے حضرت عبد اللہ بن مسعود رضی اللہ عنہ کی کچھ باتوں کا ذکر کیا اور لوگ ان کی تعریف کرنے لگے اور کہا: اے امیر المؤمنین! ہم نے کسی شخص کو بھی نہیں دیکھا جو حضرت عبد اللہ بن مسعود رضی اللہ عنہ سے زیادہ اچھے اخلاق والا، تعلیم میں نرمی کرنے والا، اور سب سے زیادہ تقوے والا، اور اچھی مجلسوں والا ہو، اس پر حضرت علی رضی اللہ عنہ نے ارشاد فرمایا: میں تم لوگوں کو اللہ کی قسم دے کر پوچھتا ہوں کہ کیا تم یہ بات صدق دل سے کہہ رہے ہو؟ لوگوں نے کہا: جی ہاں! آپ رضی اللہ عنہ نے فرمایا: اے اللہ! بیشک میں تجھے گواہ بناتا ہوں کہ بلاشبہ میں بھی وہی بات کہتا ہوں جو ان لوگوں نے کہی۔ کہ وہ افضل ہیں۔ [مصنف ابن ابي شيبه/كتاب الفضائل/حدیث: 34417]

حضرت ابو عبیدہ رحمہ اللہ فرماتے ہیں کہ حضرت ابو موسیٰ رحمہ اللہ نے ارشاد فرمایا: کہ وہ مجلسیں جن میں حضرت عبد اللہ بن مسعود رضی اللہ عنہ کے ساتھ میں بیٹھا کرتا تھا۔ وہ سنت پر عمل کرنے کے اعتبار سے بہت مضبوط تھیں۔ [مصنف ابن ابي شيبه/كتاب الفضائل/حدیث: 34418]