حضرت عبدربہ بن ابو راشد رحمہ اللہ فرماتے ہیں کہ حضرت ابن عمر رضی اللہ عنہما نے ارشاد فرمایا: بصرہ کوفہ سے بہتر ہے۔ [مصنف ابن ابي شيبه/كتاب الفضائل/حدیث: 34635]

حضرت ثابت رحمہ اللہ فرماتے ہیں کہ حضرت عبد الرحمن بن ابی لیلیٰ رضی اللہ عنہ نے ارشاد فرمایا: میں بہت سے شہروں میں پھرا ہوں پس میں نے کوئی شہر ایسا نہیں دیکھا جو بصرہ سے زیادہ تہجد گزار لوگوں والا ہو۔ [مصنف ابن ابي شيبه/كتاب الفضائل/حدیث: 34636]

حضرت محمد بن منتشر رحمہ اللہ فرماتے ہیں کہ حضرت حذیفہ رضی اللہ عنہ نے ارشاد فرمایا: یقینا بصرہ والے نہ ہدایت کا دروازہ کھولتے ہیں نہ ضلالت و گمراہی کا دروازہ چھوڑتے ہیں، اور یقینا طوفان ساری زمین والوں سے دور ہوگیا سوائے بصرہ کے۔ [مصنف ابن ابي شيبه/كتاب الفضائل/حدیث: 34637]

حضرت ابو عثمان رحمہ اللہ فرماتے ہیں کہ ایک آدمی حضرت حذیفہ رضی اللہ عنہ کی خدمت میں آیا اور کہنے لگا: میرا بصرہ جانے کا ارادہ ہے۔ تو آپ رضی اللہ عنہ نے فرمایا: مت جاؤ۔ اس شخص نے کہا: بیشک وہاں میرے قریبی رشتہ دار ہیں۔ آپ رضی اللہ عنہ نے فرمایا: مت جاؤ۔ اس شخص نے کہا: جانا ضروری ہے۔ آپ رضی اللہ عنہ نے فرمایا: اس کے کناروں پر ہی اترنا، اس کے درمیان میں مت اترنا۔ [مصنف ابن ابي شيبه/كتاب الفضائل/حدیث: 34638]