حضرت ابو مکین بن ابان رحمہ اللہ فرماتے ہیں کہ حضرت عکرمہ رحمہ اللہ جنگ میں ریشم اور دیباج پہننے کو مکروہ سمجھتے تھے۔ اور فرماتے تھے: جو شخص شہادت کی امید رکھتا ہو کیا وہ یہ پہنے گا؟!۔ [مصنف ابن ابي شيبه/كتاب السير/حدیث: 34790]

حضرت یونس بن عبید رحمہ اللہ فرماتے ہیں کہ حضرت حسن رحمہ اللہ جنگ میں ریشم پہننے کو مکروہ سمجھتے تھے۔ [مصنف ابن ابي شيبه/كتاب السير/حدیث: 34791]

حضرت ولید بن ہشام رحمہ اللہ فرماتے ہیں کہ میں نے حضرت ابن محیریز رحمہ اللہ کو خط لکھ کر پوچھا: کیا دارالحرب میں ریشم اور لمبے کوٹ پہن سکتے ہیں؟ آپ رضی اللہ عنہ نے اس خط کا جواب لکھا: جب تم نے خود کو شہادت کے لیے پیش کردیا تو تم اس چیز کو زیادہ ناپسند کرو جو قتال کے وقت بھی مکروہ ہے۔ [مصنف ابن ابي شيبه/كتاب السير/حدیث: 34792]

حضرت ولید بن ہشام رحمہ اللہ فرماتے ہیں کہ حضرت ابن محیریز رحمہ اللہ جنگ میں بھی ریشم پہننے کو مکروہ سمجھتے تھے۔ [مصنف ابن ابي شيبه/كتاب السير/حدیث: 34793]

حضرت سوید بن غفلہ رحمہ اللہ فرماتے ہیں کہ ہم لوگ جنگ یرموک میں حاضر ہوئے تو حضرت عمر رضی اللہ عنہ نے ہمارا استقبال کیا اس حال میں کہ ہم نے دیباج اور یشم پہنا ہوا تھا۔ تو آپ رضی اللہ عنہ کے حکم سے ہمیں پتھر مارے گئے۔ [مصنف ابن ابي شيبه/كتاب السير/حدیث: 34794]