حضرت عروہ بن رویم سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ میرے رب نے مجھے سب سے پہلے ان چیزوں سے منع کیا: بتوں کی عبادت کرنے سے، شراب پینے سے اور مردوں سے باہم گالی گفتار کرنے سے۔ [مصنف ابن ابي شيبه/كتاب الأوائل/حدیث: 38627]

حضرت زہری فرماتے ہیں کہ رسول اللہ صلی اللہ علیہ وآلہ وسلم ایک دیہاتی کے پاس سے گزرے اور اس سے فرمایا کہ تم پر پہلے معاہدے کی پاسداری لازم ہے۔ کیونکہ منافع سخاوت کے ساتھ ہے۔ [مصنف ابن ابي شيبه/كتاب الأوائل/حدیث: 38628]

حضرت عبید اللہ بن عتبہ فرماتے ہیں کہ حضرت ابن عباس رضی اللہ عنہما نے مجھ سے فرمایا کہ کیا تم جانتے ہو کہ سب سے آخر میں کون سی سورت پوری نازل ہوئی؟ میں نے کہا جی ہاں، سورة النصر سب سے آخر میں نازل ہوئی۔ فرمایا کہ تم نے ٹھیک کہا۔ [مصنف ابن ابي شيبه/كتاب الأوائل/حدیث: 38629]

حضرت قبیصہ بن ذؤیب فرماتے ہیں کہ حضرت ابو سلمہ حضور صلی اللہ علیہ وآلہ وسلم کی پھوپھی کے بیٹے تھے۔ وہ پہلے شخص تھے جنہوں نے اپنی سرزمین کو چھوڑ کر پہلے حبشہ اور پھر مدینہ کی طرف ہجرت کی۔ [مصنف ابن ابي شيبه/كتاب الأوائل/حدیث: 38630]

حضرت براء کہتے ہیں کہ قرآن مجید میں سب سے آخر میں یہ آیت نازل ہوئی { یَسْتَفْتُونَک قُلَ اللَّہُ یُفْتِیکُمْ فِی الْکَلاَلَۃِ } [مصنف ابن ابي شيبه/كتاب الأوائل/حدیث: 38631]

حضرت سدی فرماتے ہیں کہ قرآن مجید میں سب سے آخر میں یہ آیت نازل ہوئی: { وَاتَّقُوا یَوْمًا تُرْجَعُونَ فِیہِ إِلَی اللہِ }۔ [مصنف ابن ابي شيبه/كتاب الأوائل/حدیث: 38632]

حضرت عطیہ عوفی فرماتے ہیں کہ قرآن مجید میں سب سے آخر میں یہ آیت نازل ہوئی: { وَاتَّقُوا یَوْمًا تُرْجَعُونَ فِیہِ إِلَی اللہِ }۔ [مصنف ابن ابي شيبه/كتاب الأوائل/حدیث: 38633]

حضرت میسرہ ابو جمیلہ فرماتے ہیں کہ خوارج نے سب سے پہلے جنگ جمل کے دن بات کی تھی۔ [مصنف ابن ابي شيبه/كتاب الأوائل/حدیث: 38634]

حضرت ابن سیرین فرماتے ہیں کہ سب سے پہلے طلاء کو جنہوں نے اتنا پکایا کہ اس کے دو ثلث ختم ہوگئے اور ایک تہائی باقی رہ گیا حضرت عمر بن خطاب ہیں۔ [مصنف ابن ابي شيبه/كتاب الأوائل/حدیث: 38635]

حضرت شعبی فرماتے ہیں کہ رسول اللہ صلی اللہ علیہ وآلہ وسلم نے سب سے پہلے جو تحریر لکھی وہ بِاسْمِکَ اللَّہُمَّ تھی۔ پھر جب قرآن مجید کی آیت { بِسْمِ اللہِ مَجْرَاہَا وَمُرْسَاہَا } نازل ہوئی تو حضور صلی اللہ علیہ وآلہ وسلم نے بسم اللہ لکھی۔ پھر جب قرآن مجید کی آیت {إِنَّہُ مِنْ سُلَیْمَانَ وَإِنَّہُ بِسْمِ اللہِ الرَّحْمَن الرَّحِیمِ } نازل ہوئی تو آپ نے بسم اللہ الرحمن الرحیم پوری لکھی۔ [مصنف ابن ابي شيبه/كتاب الأوائل/حدیث: 38636]