حضرت سلمان فارسی فرماتے ہیں کہ اللہ تعالیٰ نے سب سے پہلے حضرت آدم کے سر کو پیدا کیا۔ پس حضرت آدم خود کو تخلیق ہوتا دیکھتے رہے۔ عصر کے بعد ان کے پاؤں کا بننا باقی رہ گیا تو انہوں نے کہا کہ اے میرے رب! رات سے پہلے جلدی کرکے مجھے مکمل کردیجئے۔ اللہ تعالیٰ کے فرمان (وَکَانَ الإِنْسَاْن عَجُولاً) کا یہی معنی ہے۔ [مصنف ابن ابي شيبه/كتاب الأوائل/حدیث: 38658]

حضرت عامر فرماتے ہیں کہ الْمُہَاجِرُونَ الأَوَّلُونَ وہ ہیں جنہوں نے درخت کے نیچے بیعت کی۔ [مصنف ابن ابي شيبه/كتاب الأوائل/حدیث: 38659]

حضرت مجاہد فرماتے ہیں کہ مکہ میں سب سے پہلے عبد الرحمن بن سہیل نے دروازہ بنایا۔ وہ حضرت عمر کے پاس آئے اور ان سے عرض کیا کہ بعض اوقات ہمارے پاس ایسا مہمان بھی آتا ہے جس کے ساتھ کوئی خادم نہیں آتا۔ وہ اپنی جوتی کو اتار دیتا ہے اور سواری کو کھلا چھوڑ دیتا ہے۔ ہمیں چوروں کا خدشہ ہے، ہمیں اجازت دیجئے کہ ہم دروازہ بنالیں۔ حضرت عمر نے اجازت دے دی۔ اس کے بعد قریش نے بھی دروازے بنانا شروع کردیئے۔ [مصنف ابن ابي شيبه/كتاب الأوائل/حدیث: 38660]

حضرت حسن سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ ولیمہ پہلے دن حق ہے، دوسرے دن نیکی ہے اور اس کے بعد ریاء ہے۔ [مصنف ابن ابي شيبه/كتاب الأوائل/حدیث: 38661]

حضرت ابن سیرین فرماتے ہیں کہ سب سے پہلے جس قاتل کو میراث سے محروم کیا گیا وہ قاتل تھا جس کی تلاش میں بنی اسرائیل نے گائے ذبح کی تھی۔ [مصنف ابن ابي شيبه/كتاب الأوائل/حدیث: 38662]

حضرت عیر بن اسحاق فرماتے ہیں کہ غزوہ بدر میں سب سے پہلے اہل ایمان سے کہا گیا کہ تم بھی نشان لگا لو کیونکہ آج کے دن فرشتوں نے بھی نشان اور علامت لگائی ہے۔ بس وہ پہلا دن تھا جب صوف کو بطور علامت استعمال کیا گیا۔ [مصنف ابن ابي شيبه/كتاب الأوائل/حدیث: 38663]

حضرت مطلب بن عبد اللہ بن حنطب فرماتے ہیں کہ جب حضرت عثمان بن مظعون کا وصال ہوگیا تو انہیں رسول اللہ صلی اللہ علیہ وآلہ وسلم نے بقیع میں دفن کرایا۔ وہ بقیع میں دفن ہونے والے پہلے شخص ہیں۔ پھر آپ نے اپنے پاس موجود ایک آدمی سے فرمایا کہ اس چٹان کو لے آؤ اور اس قبر کے پاس رکھ دو تاکہ میں اسے پہچان سکوں اور ہمارے اہل میں سے جس کا بیس انتقال ہوگا ہم اسے اسی کے پاس دفن کریں گے۔ [مصنف ابن ابي شيبه/كتاب الأوائل/حدیث: 38664]

حضرت عامر اس دن کے بارے میں جسے کے بارے میں لوگ کہیں کہ یہ رمضان ہے۔ فرماتے ہیں کہ تم صرف امام کے ساتھ ہی روزہ رکھو۔ کیونکہ پہلی جدائی انہی جیسے امور کے بارے میں ہوگی۔ [مصنف ابن ابي شيبه/كتاب الأوائل/حدیث: 38665]

حضرت حذیفہ رضی اللہ عنہ نے حضرت عثمان کی شہادت کا ذکر کرتے ہوئے فرمایا کہ یہ پہلا فتنہ تھا۔ [مصنف ابن ابي شيبه/كتاب الأوائل/حدیث: 38666]