حضرت مجاہد فرماتے ہیں کہ سب سے پہلے ان لوگوں نے اسلام کا اظہار کیا: حضرت ابو بکر، حضرت بلال، حضرت خباب، حضرت صہیب، حضرت عمار، حضرت سمیہ ام عمار [مصنف ابن ابي شيبه/كتاب الأوائل/حدیث: 38507]

حضرت عبد الرحمن بن ابزی فرماتے ہیں کہ میں نے حضرت عمر کے ساتھ حضرت زینب کی نماز جنازہ ادا کی، حضور صلی اللہ علیہ وآلہ وسلم کے بعد انتقال کرنے والی پہلی عورت حضرت زینب ہیں۔ [مصنف ابن ابي شيبه/كتاب الأوائل/حدیث: 38508]

حضرت زید بن ارقم رضی اللہ عنہ فرماتے ہیں کہ سب سے پہلے اسلام حضرت علی رضی اللہ عنہ نے قبول کیا۔ ابو حمزہ کہتے ہیں کہ میں نے ان کے اس قول کا تذکرہ حضرت ابراہیم سے کیا تو انہوں نے اس کا انکار کیا اور فرمایا کہ سب سے پہلے حضرت ابوبکر نے اسلام قبول کیا۔ [مصنف ابن ابي شيبه/كتاب الأوائل/حدیث: 38509]

حضرت حسن فرماتے ہیں کہ ایک آدمی کو ایک مرتبہ اس بات پر بہت سا مال دیا گیا کہ وہ نعوذ باللہ حضور صلی اللہ علیہ وآلہ وسلم کو شہید کردے۔ اللہ تعالیٰ نے حضور صلی اللہ علیہ وآلہ وسلم کو اس بات پر مطلع فرمادیاتو اس کو سولی پر چڑھانے کا حکم دیا۔ اسلام میں سب سے پہلے اسی شخص کو سولی چڑھایا گیا۔ [مصنف ابن ابي شيبه/كتاب الأوائل/حدیث: 38511]

حضرت عبد اللہ بن حارث بن جزء زبیدی فرماتے ہیں کہ سب سے پہلے میں نے حضور صلی اللہ علیہ وآلہ وسلم کو فرماتے ہوئے سنا ”تم میں سے کوئی قبلہ کی طرف منہ کرکے پیشاب نہ کرے“ سب سے پہلے میں نے ہی اس بات کو لوگوں سے بیان کیا۔ [مصنف ابن ابي شيبه/كتاب الأوائل/حدیث: 38512]

حضرت زکریا فرماتے ہیں کہ قبائل میں سب سے پہلے جس قبیلے نے ہزار کی تعداد میں حضور صلی اللہ علیہ وآلہ وسلم کی حمایت کا اعلان کیا وہ قبیلہ جہینہ ہے۔ [مصنف ابن ابي شيبه/كتاب الأوائل/حدیث: 38513]

حضرت شعبی فرماتے ہیں کہ حضور صلی اللہ علیہ وآلہ وسلم کے دست مبارک پر بیعت رضوان سب سے پہلے ابو سنان اسدی نے کی۔ [مصنف ابن ابي شيبه/كتاب الأوائل/حدیث: 38514]

حضرت مجاہد فرماتے ہیں کہ اسلام کی پہلی شہید حضرت عمار کی والدہ حضرت سمیہ ہیں۔ ابو جہل نے ان کی شرمگاہ پر نیزہ مار کر انہیں شہید کیا تھا۔ [مصنف ابن ابي شيبه/كتاب الأوائل/حدیث: 38515]

حضرت قاسم بن عبد الرحمن فرماتے ہیں کہ غزوہ بدر میں مسلمانوں کے پہلے شہید حضرت عمر کے مولیٰ حضرت مہجع ہیں۔ [مصنف ابن ابي شيبه/كتاب الأوائل/حدیث: 38516]