سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم کے اصحاب رضی اللہ عنہم نے وضو کے لیے پانی تلاش کیا تو انہیں پانی نہیں ملا۔ نبی کریم صلی اللہ علیہ وسلم نے دریافت کیا: ”کہیں تھوڑا سا پانی بھی ہے؟“ (وہ موجود تھا)، وہ نبی کریم صلی اللہ علیہ وسلم کی خدمت میں لایا گیا۔ راوی بیان کرتے ہیں: میں نے دیکھا کہ نبی کریم صلی اللہ علیہ وسلم نے اپنا دست مبارک اس برتن پر رکھا جس میں پانی موجود تھا، پھر آپ نے ارشاد فرمایا: ”اللہ کا نام لے کر وضو کرنا شروع کرو۔“ راوی بیان کرتے ہیں: میں نے دیکھا کہ آپ کی انگلیوں کے درمیان میں سے پانی کے چشمے جاری ہو گئے اور لوگوں نے وضو کرنا شروع کیا، یہاں تک کہ سب لوگوں نے وضو کر لیا۔ ثابت نامی راوی بیان کرتے ہیں: میں نے سیدنا انس رضی اللہ عنہ سے دریافت کیا: ”اس وقت آپ کی تعداد کتنی تھی؟“ سیدنا انس رضی اللہ عنہ نے جواب دیا: ”(ہم) ستر کے قریب لوگ تھے۔“ [سنن الدارقطني/كِتَابُ الطَّهَارَةِ/حدیث: 221]