عامر بن سعد اپنے والد (سیدنا سعد بن ابی وقاص رضی اللہ عنہ) کے حوالے سے نبی کریم صلی اللہ علیہ وسلم کے بارے میں بات نقل کرتے ہیں: آپ صلی اللہ علیہ وسلم دائیں طرف سلام پھیرا کرتے تھے، یہاں تک کہ آپ کے رخسار مبارک کی سفیدی نظر آ جاتی تھی اور بائیں طرف سلام پھیرا کرتے تھے، یہاں تک کہ آپ کے رخسار مبارک کی سفیدی نظر آ جاتی تھی۔ اس روایت کی سند مستند ہے۔ [سنن الدارقطني/ كِتَابُ الصَّلَاةِ/حدیث: 1346]

سیدنا عمار بن یاسر رضی اللہ عنہ بیان کرتے ہیں: نبی کریم صلی اللہ علیہ وسلم جب دائیں طرف سلام پھیرتے تھے، تو آپ کے دائیں رخسار کی سفیدی نظر آجاتی تھی اور جب بائیں طرف سلام پھیرتے تھے، تو آپ کے بائیں رخسار کی سفیدی نظر آجاتی تھی۔ آپ صلی اللہ علیہ وسلم ان الفاظ میں سلام پھیرتے تھے: ”السلام علیکم ورحمۃ اللہ، السلام علیکم ورحمۃ اللہ۔“ [سنن الدارقطني/ كِتَابُ الصَّلَاةِ/حدیث: 1347]

سیدنا عبداللہ بن مسعود رضی اللہ عنہ بیان کرتے ہیں: نبی کریم صلی اللہ علیہ وسلم جب دائیں طرف سلام پھیرتے تھے، تو ”السلام علیکم ورحمۃ اللہ“ کہتے تھے، یہاں تک کہ آپ کے اس رخسار کی سفیدی نظر آجاتی تھی اور جب بائیں طرف سلام پھیرتے تھے، (تو بھی ایسا ہی ہوتا تھا)۔ اس روایت کو نقل کرنے میں ابواسحاق رحمہ اللہ نامی راوی سے اختلاف کیا گیا ہے، اس روایت کی دوسری سند زیادہ بہتر ہے۔ [سنن الدارقطني/ كِتَابُ الصَّلَاةِ/حدیث: 1348]

سیدنا عبداللہ بن مسعود رضی اللہ عنہ بیان کرتے ہیں: مجھے نبی کریم صلی اللہ علیہ وسلم کے بارے میں یہ بات اچھی طرح یاد ہے، آپ ہر مرتبہ اٹھتے ہوئے اور جھکتے ہوئے، قیام کرتے ہوئے اور بیٹھتے ہوئے تکبیر کہا کرتے تھے اور آپ دائیں طرف اور بائیں طرف سلام پھیرتے ہوئے ”السلام علیکم ورحمۃ اللہ، السلام علیکم ورحمۃ اللہ“ کہا کرتے تھے، یہاں تک کہ آپ کے رخسار مبارک کی سفیدی نظر آجاتی تھی۔ (سیدنا عبداللہ فرماتے ہیں) میں نے سیدنا ابوبکر اور سیدنا عمر رضی اللہ عنہما کو بھی اسی طرح کرتے دیکھا ہے۔ [سنن الدارقطني/ كِتَابُ الصَّلَاةِ/حدیث: 1349]

سیدنا براء بن عازب رضی اللہ عنہ بیان کرتے ہیں: نبی کریم صلی اللہ علیہ وسلم دو مرتبہ (یعنی دونوں طرف) سلام پھیرا کرتے تھے۔ [سنن الدارقطني/ كِتَابُ الصَّلَاةِ/حدیث: 1350]

سیدنا عبداللہ بن مسعود رضی اللہ عنہ بیان کرتے ہیں: میں جو کچھ مرضی بھول جاؤں، لیکن میں نبی کریم صلی اللہ علیہ وسلم کا نماز کے دوران سلام کرنے کا طریقہ نہیں بھولوں گا۔ آپ دائیں طرف اور بائیں طرف سلام پھیرتے ہوئے ”السلام علیکم ورحمۃ اللہ“ کہا کرتے تھے۔ اس کے بعد سیدنا عبداللہ رضی اللہ عنہ نے یہ بات ارشاد فرمائی: نبی کریم صلی اللہ علیہ وسلم کے دونوں رخساروں کی سفیدی کا منظر گویا آج بھی میری نگاہ میں ہے۔ [سنن الدارقطني/ كِتَابُ الصَّلَاةِ/حدیث: 1351]

سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نماز میں ایک سلام پھیرا کرتے تھے اور وہ بھی سامنے کی طرف رخ کر کے (سلام کے کلمات) کہا کرتے تھے، آپ صلی اللہ علیہ وسلم تھوڑا سا دائیں طرف مائل ہوتے تھے۔ [سنن الدارقطني/ كِتَابُ الصَّلَاةِ/حدیث: 1352]

سیدنا سمرہ بن جندب رضی اللہ عنہ بیان کرتے ہیں: نبی کریم صلی اللہ علیہ وسلم نماز میں سامنے کی طرف منہ کر کے ایک مرتبہ سلام پڑھا کرتے تھے، لیکن جب آپ دائیں طرف سلام پھیرتے تھے، تو بائیں طرف بھی پھیر دیا کرتے تھے۔ [سنن الدارقطني/ كِتَابُ الصَّلَاةِ/حدیث: 1353]

عبدالمہیمن اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم نماز میں دائیں طرف ایک سلام پھیرا کرتے تھے۔ [سنن الدارقطني/ كِتَابُ الصَّلَاةِ/حدیث: 1354]

عبدالمہیمن اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم ایک سلام پھیرا کرتے تھے، آپ صلی اللہ علیہ وسلم مزید سلام نہیں کرتے تھے۔ [سنن الدارقطني/ كِتَابُ الصَّلَاةِ/حدیث: 1355]