مروان بیان کرتے ہیں: میں نے سیدنا عبداللہ بن عمر رضی اللہ عنہما کو دیکھا کہ انہوں نے اپنی ڈاڑھی مٹھی میں لی ہوئی تھی اور ایک مٹھی سے زیادہ جو حصہ تھا، اسے کاٹ رہے تھے۔ انہوں نے یہ بات بیان کی ہے: نبی کریم صلی اللہ علیہ وسلم افطاری کے وقت یہ دعا پڑھا کرتے تھے: ”پیاس ختم ہو گئی، رگیں تر ہو گئیں اور اگر اللہ نے چاہا، تو اجر بھی ثابت ہو گیا۔“ اس روایت کو نقل کرنے میں حسین بن واقد رحمہ اللہ نامی راوی منفرد ہیں اور اس کی سند حسن ہے۔ [سنن الدارقطني/ كِتَابُ الصِّيَامِ/حدیث: 2279]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم افطاری کے وقت یہ دعا مانگا کرتے تھے: ”اے اللہ! ہم نے تیرے لیے روزہ رکھا اور تیری عطا کردہ رزق سے ہم نے افطار کیا، تو ہماری طرف سے اسے قبول فرما، بیشک تو سننے والا اور جاننے والا ہے۔“ [سنن الدارقطني/ كِتَابُ الصِّيَامِ/حدیث: 2280]