عروہ نے سیدہ عائشہ رضی اللہ عنہا کے حوالے سے، جبکہ سالم نے سیدنا عبداللہ بن عمر رضی اللہ عنہما کے حوالے سے نقل کیا: ان دونوں نے فرمایا ہے: ان ایام کے روزے کے بارے میں رخصت صرف اس شخص کے لیے ہے، جس کے پاس قربانی کا جانور نہ ہو۔ نیشا پوری نامی راوی نے یہ بات اضافی نقل کی ہے: ”تشریق کے ایام۔“ [سنن الدارقطني/ كِتَابُ الصِّيَامِ/حدیث: 2281]

یہی روایت ایک اور سند کے ہمراہ بھی منقول ہے اور اس کی سند صحیح ہے۔ [سنن الدارقطني/ كِتَابُ الصِّيَامِ/حدیث: 2282]

سیدنا عبداللہ بن عمر رضی اللہ عنہما فرماتے ہیں: نبی کریم صلی اللہ علیہ وسلم نے حج تمتع کرنے والے کے لیے اجازت دی کہ اگر اس کے پاس قربانی کے لیے جانور نہ ہو، تو وہ ایام تشریق میں روزہ رکھ لے۔ اس روایت کے راوی یحییٰ بن سلام مستند نہیں ہیں۔ [سنن الدارقطني/ كِتَابُ الصِّيَامِ/حدیث: 2283]

سیدہ عائشہ رضی اللہ عنہا بیان کرتی ہیں: ایام تشریق میں روزہ رکھنے کی رخصت صرف حج تمتع کرنے والے کے لیے ہے، جس کے ساتھ قربانی کا جانور نہ ہو۔ اس حدیث کی سند صحیح ہے۔ [سنن الدارقطني/ كِتَابُ الصِّيَامِ/حدیث: 2284]

عروہ بن زبیر نے یہ بات بیان کی ہے: سیدہ عائشہ اور سیدنا عبداللہ بن عمر رضی اللہ عنہما دونوں نے یہ بات بیان کی ہے: نبی کریم صلی اللہ علیہ وسلم نے بھی شخص کو تشریق کے ایام میں روزہ رکھنے کی رخصت نہیں دی، ماسوائے اس شخص کے جو حج تمتع کرے (اور اس کے ساتھ قربانی کا جانور نہ ہو) اور وہ شخص جو محصور ہو جائے۔ عبدالغفار نامی راوی نے اس روایت کی سند میں غلطی کی ہے۔ یہ صاحب ابومریم الکوفی ہیں اور ضعیف ہیں۔ [سنن الدارقطني/ كِتَابُ الصِّيَامِ/حدیث: 2285]

سیدہ عائشہ رضی اللہ عنہا بیان کرتی ہیں کہ میں نے نبی کریم صلی اللہ علیہ وسلم کو یہ بات ارشاد فرماتے ہوئے سنا ہے: ”جس شخص کے ساتھ قربانی کا جانور نہ ہو، وہ قربانی سے تین دن پہلے روزے رکھے اور جو شخص ان تین دنوں میں روزہ نہیں رکھ پایا، وہ ایام تشریق (یعنی منیٰ کے ایام میں) روزہ رکھ لے۔“ اس روایت کے راوی یحییٰ بن ابوانیسہ ضعیف ہیں۔ [سنن الدارقطني/ كِتَابُ الصِّيَامِ/حدیث: 2286]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے سیدنا عبداللہ بن حذافہ رضی اللہ عنہ کو منیٰ میں چکر لگانے کے لیے بھیجا (کہ وہ اعلان کریں): ”تم ان دنوں میں روزہ نہ رکھو! کیونکہ یہ کھانے پینے کے دن ہیں اور اللہ تعالیٰ کا ذکر کرنے کے دن ہیں۔“ [سنن الدارقطني/ كِتَابُ الصِّيَامِ/حدیث: 2287]

یہی روایت ایک اور سند کے ہمراہ سیدنا ابوہریرہ رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔ [سنن الدارقطني/ كِتَابُ الصِّيَامِ/حدیث: 2288]

سیدنا عبداللہ بن حذافہ سہمی رضی اللہ عنہ بیان کرتے ہیں: نبی کریم صلی اللہ علیہ وسلم نے ان سمیت چند افراد کو یہ ہدایت کی کہ وہ حجۃ الوداع کے موقع پر قربانی کے دن منیٰ میں چکر لگاتے ہوئے یہ اعلان کریں کہ: ”یہ کھانے پینے اور اللہ کا ذکر کرنے کے دن ہیں، تم ان دنوں میں روزہ نہ رکھو، ماسوائے اس روزے کے جو قربانی کے حوالے سے ہوتا ہے۔“ [سنن الدارقطني/ كِتَابُ الصِّيَامِ/حدیث: 2289]

مسعود بن حکم، نبی کریم صلی اللہ علیہ وسلم کے ایک صحابی کے حوالے سے یہ بات نقل کرتے ہیں: نبی کریم صلی اللہ علیہ وسلم نے سیدنا عبداللہ بن حذافہ رضی اللہ عنہ کو یہ ہدایت کی کہ وہ ایام تشریق کے دنوں میں اعلان کریں: ”خبردار! یہ عید کے دن ہیں اور کھانے پینے اور ذکر کرنے کے دن ہیں، تو ان دنوں میں روزہ صرف وہ شخص رکھے، جو محصور ہو یا حج تمتع کرنے والا ہو اور اس کے ساتھ قربانی کا جانور نہ ہو اور وہ شخص، جس نے حج کے ایام میں مسلسل روزے نہ رکھے ہوں، تو وہ ان دنوں میں روزے رکھ سکتا ہے۔“ اس روایت کے راوی سلیمان بن ابوداؤد ضعیف ہیں۔ اس روایت کو زبیدی نے زہری کے حوالے سے نقل کیا ہے، جسے انہوں نے مسعود بن حکم کے حوالے سے نبی کریم صلی اللہ علیہ وسلم کے ایک صحابی کے حوالے سے نقل کیا ہے، تاہم اس میں یہ الفاظ نہیں ہیں: ”ماسوائے محصور اور حج تمتع کرنے والے کے۔“ [سنن الدارقطني/ كِتَابُ الصِّيَامِ/حدیث: 2290]