سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”نصف شعبان گزر جانے کے بعد روزہ نہیں رکھنا چاہیے، یہاں تک کہ رمضان آ جائے، البتہ جس شخص پر رمضان (کی قضاء یا کفارے کے) روزے لازم ہوں، وہ روزے رکھ سکتا ہے، وہ اپنے معمول کو ترک نہ کرے۔“ عبدالرحمن بن ابراہیم نامی راوی ضعیف ہے۔ [سنن الدارقطني/ كِتَابُ الصِّيَامِ/حدیث: 2312]

سیدنا ابوہریرہ رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”جس شخص کے ذمے رمضان کا ایک روزہ ہو، وہ اسے جاری رکھے اور روزہ رکھ لے (اور درمیان میں چھوڑے نہیں)۔“ [سنن الدارقطني/ كِتَابُ الصِّيَامِ/حدیث: 2313]

سیدنا ابوہریرہ رضی اللہ عنہ بیان کرتے ہیں: نبی کریم صلی اللہ علیہ وسلم نے رمضان کی قضاء کے بارے میں یہ بات ارشاد فرمائی ہے: ”آدمی اسے جاری رکھے اور اس میں فرق نہ ڈالے۔“ اس روایت کا راوی عبدالرحمن بن ابراہیم ضعیف ہے۔ [سنن الدارقطني/ كِتَابُ الصِّيَامِ/حدیث: 2314]

سیدہ عائشہ رضی اللہ عنہا بیان کرتی ہیں: یہ آیت نازل ہوئی تھی: ”تو اس کی گنتی دوسرے دنوں میں ہو گی جو لگاتار ہوں گے۔“ اس کے بعد لفظ ”لگاتار“ ساقط ہو گیا۔ اس کی سند مستند ہے اور اس کے بعد والی روایت کی بھی سند مستند ہے۔ [سنن الدارقطني/ كِتَابُ الصِّيَامِ/حدیث: 2315]

سیدہ عائشہ رضی اللہ عنہا بیان کرتی ہیں: یہ آیت نازل ہوئی تھی: ”تو اس کی گنتی دوسرے دنوں میں ہو گی جو لگاتار ہوں گے۔“ اس کے بعد لفظ ”لگاتار“ ساقط ہو گیا۔ اس میں ساقط ہونے کا تذکرہ عروہ رحمہ اللہ نے کیا ہے۔ [سنن الدارقطني/ كِتَابُ الصِّيَامِ/حدیث: 2316]

سیدنا عبداللہ بن عمرو رضی اللہ عنہ بیان کرتے ہیں: نبی کریم صلی اللہ علیہ وسلم سے رمضان کی قضاء کے بارے میں دریافت کیا گیا، تو آپ صلی اللہ علیہ وسلم نے ارشاد فرمایا: ”اس روزہ دار لگاتار قضاء کرے گا، اگر وہ درمیان میں فرق ڈال دیتا ہے، تو ایسا کرنا اس کے لیے جائز ہو گا۔“ اس روایت کا راوی واقدی ضعیف ہے۔ [سنن الدارقطني/ كِتَابُ الصِّيَامِ/حدیث: 2317]

ابوعامر ہوزنی بیان کرتے ہیں: میں نے سیدنا ابوعبیدہ بن جراح رضی اللہ عنہ کو سنا، ان سے رمضان کی قضاء کے بارے میں دریافت کیا گیا، انہوں نے ارشاد فرمایا: ”بیشک اللہ تعالیٰ نے تمہیں یہ رخصت نہیں دی ہے، تم یہ روزے نہ رکھو اور نہ وہ یہ چاہتا ہے، اس کی قضاء کے حوالے سے تم کو مشقت کا شکار کرے، اس لیے تم گنتی کو شمار کرو اور جیسے چاہو ویسے رکھ لو۔“ [سنن الدارقطني/ كِتَابُ الصِّيَامِ/حدیث: 2318]

ابوعامر ہوزنی بیان کرتے ہیں: میں نے سیدنا ابوعبیدہ بن جراح رضی اللہ عنہ کو سنا، ان سے رمضان کی قضاء متفرق طور پر ادا کرنے کے بارے میں دریافت کیا گیا، تو انہوں نے فرمایا: ”تم گنتی کو شمار کرو اور جیسے چاہو روزے رکھ لو۔“ [سنن الدارقطني/ كِتَابُ الصِّيَامِ/حدیث: 2319]

سیدنا عبداللہ بن عباس رضی اللہ عنہما سے رمضان کی قضاء کے بارے میں یہ بات منقول ہے: (وہ فرماتے ہیں) ”تم اسے جیسے چاہو رکھ لو۔“ سیدنا عبداللہ بن عمر رضی اللہ عنہما فرماتے ہیں: ”تم روزے ویسے ہی رکھو گے، جیسے (رمضان کے مہینے میں) روزے چھوڑے تھے۔“ [سنن الدارقطني/ كِتَابُ الصِّيَامِ/حدیث: 2320]

سیدنا عبداللہ بن عباس اور سیدنا ابوہریرہ رضی اللہ عنہ نے یہ بات ارشاد فرمائی ہے: ”رمضان کی قضاء متفرق طور پر رکھنے میں کوئی حرج نہیں ہے۔“ [سنن الدارقطني/ كِتَابُ الصِّيَامِ/حدیث: 2321]