سیدہ عائشہ رضی اللہ عنہا بیان کرتی ہیں: نبی کریم صلی اللہ علیہ وسلم نے حج افراد کیا تھا۔ [سنن الدارقطني/ كِتَابُ الْحَجِّ/حدیث: 2508]

سیدنا عبداللہ بن عمر رضی اللہ عنہما بیان کرتے ہیں: ہم نے نبی کریم صلی اللہ علیہ وسلم کے ساتھ حج افراد کا احرام باندھا تھا۔ [سنن الدارقطني/ كِتَابُ الْحَجِّ/حدیث: 2509]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے پہلے سیدنا عتاب بن اسید رضی اللہ عنہ کو امیر الحج مقرر کیا، تو انہوں نے حج افراد کیا، پھر ۹ ہجری میں آپ نے سیدنا ابوبکر رضی اللہ عنہ کو امیر الحج مقرر کیا، تو انہوں نے بھی حج افراد کیا، ۱۰ ہجری میں نبی کریم صلی اللہ علیہ وسلم نے خود حج کیا، تو آپ نے بھی حج افراد کیا، آپ کے بعد سیدنا ابوبکر رضی اللہ عنہ خلیفہ بنے، تو انہوں نے سیدنا عمر رضی اللہ عنہ کو (امیر الحج بنا کر) بھیجا، تو انہوں نے بھی حج افراد کیا، پھر سیدنا ابوبکر رضی اللہ عنہ نے خود حج کیا، تو انہوں نے بھی حج افراد کیا، پھر سیدنا ابوبکر رضی اللہ عنہ کا انتقال ہو گیا، تو ان کے بعد سیدنا عمر رضی اللہ عنہ خلیفہ بنے، انہوں نے سیدنا عبدالرحمن بن عوف رضی اللہ عنہ کو (امیر الحج بنا کر) بھیجا، تو انہوں نے بھی حج افراد کیا، پھر اس کے بعد سیدنا عمر رضی اللہ عنہ نے کئی مرتبہ حج کیا اور ہمیشہ حج افراد کیا، پھر سیدنا عمر رضی اللہ عنہ کا انتقال ہو گیا اور سیدنا عثمان رضی اللہ عنہ خلیفہ بنے، تو انہوں نے بھی حج افراد کیا، پھر سیدنا عثمان رضی اللہ عنہ کو محصور کر دیا گیا، تو سیدنا عبداللہ بن عباس رضی اللہ عنہما نے حج میں لوگوں کی قیادت کا فریضہ سرانجام دیا، انہوں نے بھی حج افراد کیا۔ [سنن الدارقطني/ كِتَابُ الْحَجِّ/حدیث: 2510]

عبدالرحمن بن اسود اپنے والد کا یہ بیان نقل کرتے ہیں: میں نے سیدنا ابوبکر رضی اللہ عنہ کے ساتھ حج کیا ہے، انہوں نے حج افراد کیا تھا، میں نے سیدنا عمر رضی اللہ عنہ کے ساتھ حج کیا ہے، انہوں نے حج افراد کیا تھا، میں نے سیدنا عثمان رضی اللہ عنہ کے ساتھ حج کیا ہے، انہوں نے حج افراد کیا تھا۔ [سنن الدارقطني/ كِتَابُ الْحَجِّ/حدیث: 2511]