یہی روایت بعض دیگر اسناد کے حوالے سے بھی سیدنا خوات بن جبیر رضی اللہ عنہ کے حوالے سے منقول ہے۔ [سنن الدارقطني/ كِتَابُ الْمُكَاتَبِ/حدیث: 4243]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”جو شخص کسی کو آزاد کرتا ہے اور اس غلام کا کوئی مال بھی موجود ہو، تو وہ مال غلام کے پاس رہے گا، البتہ اگر اس کا آقا استثناء کرے، تو حکم مختلف ہو گا۔“ [سنن الدارقطني/ كِتَابُ الْمُكَاتَبِ/حدیث: 4244]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے یہ بات ارشاد فرمائی ہے: ”جب کوئی شخص کسی غلام کو آزاد کرتا ہے، تو اس کا مال بھی اس کے ساتھ رہتا ہے، البتہ اگر آزاد کرنے والے نے اس مال کی شرط عائد کر دی ہو (تو حکم مختلف ہو گا)۔“ [سنن الدارقطني/ كِتَابُ الْمُكَاتَبِ/حدیث: 4245]

سیدنا عمر رضی اللہ عنہ کے بارے میں یہ بات منقول ہے کہ انہوں نے یہ فیصلہ دیا تھا کہ ام ولد کو فروخت نہیں کیا جائے گا، اسے ہبہ نہیں کیا جائے گا، وہ وراثت میں منتقل نہیں کی جائے گی، اس کا آقا اس سے فائدہ اٹھاتا رہے گا، جب تک وہ زندہ رہے گا، جب وہ آقا مر جائے گا، تو ام ولد آزاد شمار ہو گی۔ [سنن الدارقطني/ كِتَابُ الْمُكَاتَبِ/حدیث: 4246]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے ام ولد کو فروخت کرنے سے منع کیا ہے، آپ نے ارشاد فرمایا ہے: ”انہیں فروخت نہیں کیا جائے گا، انہیں ہبہ نہیں کیا جائے گا، وہ وراثت میں تقسیم نہیں ہوں گی، ان کا آقا جب تک زندہ رہے گا، ان سے نفع حاصل کرے گا اور جب وہ آقا فوت ہو جائے گا، تو وہ ام ولد آزاد شمار ہوں گی۔“ [سنن الدارقطني/ كِتَابُ الْمُكَاتَبِ/حدیث: 4247]

یہی روایت ایک اور سند کے حوالے سے سیدنا عمر رضی اللہ عنہ سے منقول ہے اور ”مرفوع“ حدیث کے طور پر منقول نہیں ہے۔ [سنن الدارقطني/ كِتَابُ الْمُكَاتَبِ/حدیث: 4248]

سیدنا عبداللہ بن عمر رضی اللہ عنہما، سیدنا عمر رضی اللہ عنہ کا یہ بیان نقل کرتے ہیں کہ انہوں نے ام ولد کو فروخت کرنے سے منع کیا ہے، اسے ہبہ نہیں کیا جا سکتا، وہ وراثت میں تقسیم نہیں ہو گی، اس کا آقا اپنی زندگی میں اس سے نفع حاصل کرتا رہے گا، جب آقا فوت ہو جائے گا، تو وہ ام ولد آزاد شمار ہو گی۔ [سنن الدارقطني/ كِتَابُ الْمُكَاتَبِ/حدیث: 4249]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے ام ولد کو فروخت کرنے سے منع کیا ہے، انہیں فروخت نہیں کیا جا سکے گا، انہیں ہبہ نہیں کیا جا سکے گا، وہ وراثت میں تقسیم نہیں ہوں گی، ان کا آقا جب تک مناسب سمجھے گا (یعنی جب تک زندہ رہے گا)، ان سے نفع حاصل کرتا رہے گا، جب وہ آقا فوت ہو جائے گا، تو وہ ام ولد آزاد ہو جائے گی۔ [سنن الدارقطني/ كِتَابُ الْمُكَاتَبِ/حدیث: 4250]

سیدنا جابر بن عبداللہ رضی اللہ عنہ بیان کرتے ہیں: ہم پہلے اپنی ام ولد کنیزوں کو فروخت کر دیا کرتے تھے اور نبی کریم صلی اللہ علیہ وسلم اس وقت حیات تھے، ہم اس میں کوئی حرج محسوس نہیں کرتے تھے (یعنی نبی کریم صلی اللہ علیہ وسلم کی زندگی میں ہم ایسا کیا کرتے تھے)۔ [سنن الدارقطني/ كِتَابُ الْمُكَاتَبِ/حدیث: 4251]

سیدنا ابوسعید خدری رضی اللہ عنہ ام ولد کے بارے میں یہ فرماتے ہیں کہ نبی کریم صلی اللہ علیہ وسلم کے زمانہ اقدس میں ہم اس کی خرید و فروخت کر لیا کرتے تھے۔ [سنن الدارقطني/ كِتَابُ الْمُكَاتَبِ/حدیث: 4252]