عامر بن سعد اپنے والد کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”جس چیز کی زیادہ مقدار نشہ کر دے میں اس کی تھوڑی مقدار سے بھی تمہیں منع کرتا ہوں۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4640]

عامر بن سعد اپنے والد کے حوالے سے نبی کریم صلی اللہ علیہ وسلم کا یہ فرمان نقل کرتے ہیں: ”جس چیز کی زیادہ مقدار نشہ کر دے میں اس کی تھوڑی مقدار سے بھی تمہیں منع کرتا ہوں۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4641]

سیدنا ابوہریرہ رضی اللہ عنہ بیان کرتے ہیں: میں نے (شراب بنانے کے مخصوص برتن) دباء میں نیند تیار کی، تاکہ اسے نبی کریم صلی اللہ علیہ وسلم کی خدمت میں تحفے کے طور پر اس دن پیش کروں، جب آپ نے روزہ رکھا ہوا تھا۔ جب افطاری کا وقت ہوا تو میں اسے اٹھا کر آپ کی خدمت میں لایا۔ آپ نے دریافت کیا: اے ابوہریرہ! یہ کیا ہے؟ میں نے عرض کی: یا رسول اللہ! میرے ماں باپ آپ پر قربان ہوں، یہ نبیذ ہے، جو میں نے آپ کے لیے تیار کی۔ مجھے پتا تھا آپ آج روزہ رکھیں گے تو میری یہ خواہش ہے کہ آپ اسے استعمال کریں۔ نبی کریم صلی اللہ علیہ وسلم نے فرمایا: ”اسے میرے قریب کرو۔“ جب نبی کریم صلی اللہ علیہ وسلم نے اس کا جائزہ لیا تو اس میں جوش آ چکا تھا۔ آپ نے فرمایا: ”اسے اس دیوار پر مار دو، کیونکہ اسے وہ پیے گا جو اللہ تعالیٰ اور آخرت کے دن پر ایمان نہ رکھتا ہو۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4642]

سیدنا نعمان بن بشیر رضی اللہ عنہ بیان کرتے ہیں: میں نے نبی کریم صلی اللہ علیہ وسلم کو یہ فرماتے ہوئے سنا ہے: ”خمر انگور، کھجور، کشمش، گندم، جو اور ذرہ سے تیار کی جاتی ہے اور میں تمہیں ہر نشہ آور چیز سے منع کرتا ہوں۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4643]

سیدنا عبداللہ بن عمر رضی اللہ عنہما بیان کرتے ہیں: میں نے سیدنا عمر رضی اللہ عنہ کو نبی کریم صلی اللہ علیہ وسلم کے منبر پر یہ فرماتے ہوئے سنا: ”اما بعد! اے لوگو! جب شراب کی حرمت کا حکم نازل ہوا تو یہ پانچ چیزوں سے بنائی جاتی تھی: انگور، شہد، کھجور، گندم اور جو۔ ہر وہ چیز جو عقل کو ڈھانپ لے (یعنی نشہ پیدا کر دے) وہ خمر ہے۔ اے لوگو! تین چیزوں کے بارے میں میری یہ خواہش تھی کہ نبی کریم صلی اللہ علیہ وسلم اس بارے میں ہمیں وضاحت کر دیتے: دادا (کے اثت میں حصہ)، کلالہ اور سود (کی کچھ صورتیں)۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4644]

سیدنا عبداللہ بن عمر رضی اللہ عنہما بیان کرتے ہیں: میں نے سیدنا عمر رضی اللہ عنہ کو نبی کریم صلی اللہ علیہ وسلم کے منبر پر یہ فرماتے ہوئے سنا: ”اما بعد! اے لوگو! جب شراب کی حرمت کا حکم نازل ہوا تو یہ پانچ چیزوں سے بنائی جاتی تھی: انگور، گندم، جو، کھجور اور شہد۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4645]

امام شعبی بیان کرتے ہیں: میں نے سیدنا نعمان بن بشیر رضی اللہ عنہ کو اس منبر (راوی کہتے ہیں: یعنی کوفہ کے منبر) پر یہ بیان کرتے ہوئے سنا کہ نبی کریم صلی اللہ علیہ وسلم نے فرمایا: ”بیشک کھجور، کشمش، گندم، جو اور شہد سے شراب بنائی جاتی ہے۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4646]

سیدنا نعمان بن بشیر رضی اللہ عنہ مرفوع حدیث کے طور پر یہ بات نقل کرتے ہیں کہ نبی کریم صلی اللہ علیہ وسلم نے فرمایا: ”شراب پانچ چیزوں سے بنائی جاتی ہے: گندم، جو، کھجور، کشمش اور شہد اور ہر وہ چیز جس کے ذریعے عقل پر پردہ پڑ جائے، وہ خمر ہوتی ہے۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4647]

سیدنا نعمان بن بشیر رضی اللہ عنہ، نبی کریم صلی اللہ علیہ وسلم کا یہ فرمان نقل کرتے ہیں: ”کھجور سے شراب بنتی ہے، کشمش سے شراب بنتی ہے، گندم سے شراب بنتی ہے، جو سے شراب بنتی ہے اور شہد سے شراب بنتی ہے۔“ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4648]

یہی روایت ایک اور سند کے ہمراہ سیدنا نعمان بن بشیر رضی اللہ عنہ کے حوالے سے منقول ہے، تاہم اس میں راوی کو نقل کرنے میں وہم ہوا ہے۔ [سنن الدارقطني/ كِتَابُ الْأَشْرِبَةِ وَغَيْرِهَا/حدیث: 4649]