سیدنا جابر بن عبد اللہ رضی اللہ عنہما سے روایت ہے: ایک یہودی جس کا نام بستانی تھا، رسول اللہ صلی اللہ علیہ وسلم کے پاس آیا اور کہا: اے محمد صلی اللہ علیہ وسلم ! مجھے ان ستاروں کے نام بتائیں جنہیں سیدنا یوسف علیہ السلام نے سجدہ کرتے دیکھا تھا، ان کے نام کیا ہیں؟ رسول اللہ صلی اللہ علیہ وسلم نے اسے کوئی جواب نہ دیا، پھر جبرائیل علیہ السلام نازل ہوئے اور آپ صلی اللہ علیہ وسلم کو خبر دی۔ رسول اللہ صلی اللہ علیہ وسلم نے یہودی کو بلوایا اور اس سے پوچھا: بتاؤ اگر میں تمہیں خبر دوں تو کیا تم اسلام قبول کرو گے؟ اس نے کہا: ہاں۔ تو رسول اللہ صلی اللہ علیہ وسلم نے فرمایا: «حُرْثَانُ»، «الطَّارِقُ»، «الذَّيَّالُ»، «ذُو الْكَنَفَاتِ»، «ذُو الْفَرَعِ»، «وَثَّابُ»، «عَمُودَانِ»، «قَابِسُ»، «الصَّرُوحُ»، «الْمُصَبِّحُ»، «الْفَلِيقُ»، «الضِّيَاءُ»، اور «النُّورُ»، سیدنا یوسف علیہ السلام نے آسمان کے افق پر ان کو سجدہ کرتے ہوئے دیکھا تھا۔ جب سیدنا یوسف علیہ السلام نے اپنے والد سیدنا یعقوب علیہ السلام کو اپنا خواب بیان کیا تو انہوں نے کہا: یہ ایک بکھرا ہوا معاملہ ہے جسے اللہ بعد میں جمع فرما دے گا۔ یہودی نے کہا: اللہ کی قسم! یہی ان کے نام ہیں۔ الحکم نے کہا: «الضِّيَاءُ» یعنی سورج ان کے والد تھے اور «النُّورُ» یعنی چاند ان کی والدہ تھیں۔ [سنن سعید بن منصور/كِتَابُ التَّفْسِيرِ/حدیث: 1111]