سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم پر یہ آیت نازل ہوئی۔ ”آسمانوں میں جو کچھ ہے، اور زمین میں جو کچھ ہے، وہاللہ تعالیٰ کی ملکیت ہے، تمہارے دلوں میں جو کچھ ہے۔ اگر تم اسے ظاہر کر دیتے ہو، یا پوشیدہ رکھتے ہو، تواللہ تعالیٰ اس بارے میں تم سے حساب لے گا، اور پھر وہ جس شخص کی چاہے گا مغفرت کر دے گا اور جس کو چاہے گا، وہ عذاب دے گا،اللہ تعالیٰ ہر شے پر قدرت رکھتا ہے۔“
(راوی بیان کرتے ہیں) تو لوگ نبی اکرم صلی اللہ علیہ وسلم کی خدمت میں حاضر ہوئے، وہ گھٹنوں کے بل جھک گئے اور انہوں نے عرض کی: ہم اس کی طاقت نہیں رکھتے۔ ہم اس کی استطاعت نہیں رکھتے۔ ہمیں ایک ایسی چیز کا پابند کر دیا گیا ہے، جس کی ہم طاقت بھی نہیں رکھتے اور استطاعت بھی نہیں رکھتے۔ تواللہ تعالیٰ نے یہ آیت نازل کی۔ ”رسول اس چیز پر ایمان لایا ہے، جو اس کے پروردگار کی طرف سے اس پر نازل کی گئی ہے، اور اہل ایمان بھی ایمان لاتے ہیں۔“ یہ آیت یہاں تک ہے: ”تجھ سے مغفرت طلب کرتے ہیں اے ہمارے پرورگار! اور بے شک تیری ہی طرف لوٹنا ہے۔“ تو نبی اکرم صلی اللہ علیہ وسلم نے یہ بات ارشاد فرمائی: ”تم لوگ اس طرح نہ کہو، جس طرح تم سے پہلے اہل کتاب نے کہا: تھا ہم نے یہ بات سن لی ہے، ہم اس کی نافرمانی کرتے ہیں، بلکہ تم لوگ یہ کہو: ہم نے یہ بات سن لی ہے، اور ہم اس کی فرمانبرداری کرتے ہیں۔ اے ہمارے پروردگار! مغفرت تجھ سے حاصل ہو سکتی ہے، اور تیری طرف لوٹنا ہے۔“ تواللہ تعالیٰ نے یہ آیت نازل کی۔ ”اللہ تعالیٰ ہر نفس کو اس کی استطاعت کے مطابق پابند کرتا ہے، جو وہ کمائے گا، وہ اسے مل جائے گا اور جو وہ خرابی کرے گا اس کا وبال اس کے ذمے ہو گا۔ اے ہمارے پرورگار! اگر ہم بھول جائیں، یا غلطی کریں، تو ہم سے مواخذہ نہ کرنا۔“ پروردگار نے فرمایا: جی ہاں! (وہ لوگ یہ دعا کریں گے) ”اے ہمارے پروردگار! تو ہمیں اس چیز کا پابند نہ کرنا، جس کی ہم میں طاقت نہ ہو، اور تو ہم سے درگزر کرنا اور ہماری مغفرت کرنا اور ہم پر رحم کرنا تو ہمارا آقا ہے، اور تو کافر لوگوں کے مقابلے میں ہماری مدد کرنا۔“ تو پروردگار فرمائے گا: جی ہاں! (یعنی میں ایسا ہی کروں گا) [صحیح ابن حبان/كِتَابُ الإِيمَانِ/حدیث: 139]