علی بن عثام بیان کرتے ہیں: میں سعیر بن خمس کی خدمت میں آیا، تاکہ ان سے وسوسے کے بارے میں حدیث کے بارے میں دریافت کروں، تو انہوں نے مجھے وہ حدیث بیان نہیں کی، میں روتا ہوا واپس آ گیا، پھر میری ان سے ملاقات ہوئی، تو انہوں نے فرمایا: آگے آؤ۔ مغیرہ نے ابراہیم کے حوالے سے، علقمہ کے حوالے سے، سیدنا عبداللہ رضی اللہ عنہ کا یہ بیان نقل کیا ہے: ہم نے نبی اکرم صلی اللہ علیہ وسلم سے ایسے شخص کے بارے میں دریافت کیا: جو ایسی چیز کو پاتا ہے یعنی وسوسہ یا منفی خیال پاتا ہے) کہ اگر وہ آسمان سے نیچے گر جائے، اور پرندے اسے اچک لیں تو یہ بات اس کے نزدیک اس سے زیادہ محبوب ہو کہ وہ اس (وسوسے کے بارے میں) کلام کرے۔ نبی اکرم صلی اللہ علیہ وسلم نے ارشاد فرمایا: ”یہ صریح ایمان ہے۔“ [صحیح ابن حبان/كِتَابُ الإِيمَانِ/حدیث: 149]