سیدہ عائشہ صدیقہ رضی اللہ عنہا بیان کرتی ہیں: ایک مرتبہ حولاء بنت تویت رضی اللہ عنہا سیدہ عائشہ رضی اللہ عنہا کے پاس سے گزریں، اس وقت نبی اکرم صلی اللہ علیہ وسلم سیدہ عائشہ رضی اللہ عنہا کے پاس موجود تھے۔ سیدہ عائشہ رضی اللہ عنہا بیان کرتی ہیں: میں نے عرض کی: یہ حولاء بنت تویت ہیں، یہ رات بھر سوتی نہیں ہیں بلکہ نفل پڑھتی رہتی ہیں، تو نبی اکرم صلی اللہ علیہ وسلم نے ارشاد فرمایا: ”یہ رات بھر سوتی نہیں ہیں؟ تم لوگ اتنا عمل کیا کرو جس کی تم میں طاقت ہو۔ اللہ کی قسم! اللہ تعالیٰ کا فضل اس وقت تک تم سے منقطع نہیں ہوتا جب تک تم تھک نہیں جاتے ہو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”اللہ تعالیٰ تھکتا نہیں ہے یہاں تک کہ تم تھک جاتے ہو۔“ یہ لوگوں کے محاورے کے الفاظ ہیں جو مخاطب تک مفہوم منتقل کرنے کے لیے استعمال کیے گئے ہیں، اور وہ مفہوم انہی الفاظ کے ذریعے منتقل ہو سکتا ہے۔ [صحیح ابن حبان/كِتَابُ البِرِّ وَالإِحْسَانِ/حدیث: 359]