عبدالله محیریز بیان کرتے ہیں: یہ سیدنا ابومحذورہ کے زیر پرورش تھے جب یہ شام جانے لگے تو یہ بیان کرتے ہیں: میں نے سیدنا ابومحذورہ سے کہا: میں شام جانے لگا ہوں مجھ سے اذان کے واقعہ کے بارے میں دریافت کیا جائے گا، تو آپ مجھے اس بارے میں بتائیے تو سیدنا ابومحذورہ نے بتایا ہم کچھ لوگ روانہ ہوئے ہم حنین کے راستے میں کسی جگہ پر تھے اس وقت نبی اکرم صلی اللہ علیہ وسلم حنین سے واپس تشریف لا رہے تھے نبی اکرم صلی اللہ علیہ وسلم کا سامنا راستے میں ہم سے ہوا اللہ کے رسول کے مؤذن نے نماز کے لئے نبی اکرم صلی اللہ علیہ وسلم کے پاس اذان دی ہم نے اس کی آواز سنی ہم راستے سے ایک طرف ہٹ چکے تھے، تو ہم نے اس کا مذاق اڑانے کے لئے ان کلمات کو بلند آواز میں دہرانا شروع کر دیا۔ نبی اکرم صلی اللہ علیہ وسلم نے یہ آواز سن لی۔ آپ نے دریافت کیا: تم میں سے کون اس شخص کو جانتا ہے، جس کی آواز کو میں نے سنا ہے راوی بیان کرتے ہیں: پھر ہمیں لا کر نبی اکرم صلی اللہ علیہ وسلم کے سامنے کھڑا کر دیا گیا۔ نبی اکرم صلی اللہ علیہ وسلم نے دریافت کیا: تم میں سے کس کی وہ آواز تھی۔ راوی بیان کرتے ہیں: سب لوگوں نے میری طرف اشارہ کیا۔ راوی کہتے ہیں پھر ان سب کو نبی اکرم صلی اللہ علیہ وسلم نے چھوڑ دیا، اور مجھے اپنے پاس روک لیا۔ میرے نزدیک اس سے زیادہ ناپسندیدہ چیز اور کوئی نہیں تھی جس کا حکم مجھے اللہ کے رسول مجھے دیں۔ آپ نے مجھے اذان دینے کا حکم دیا۔ نبی اکرم صلی اللہ علیہ وسلم نے بذات خود مجھے اذان کے کلمات سکھائے آپ نے فرمایا: تم یہ کہو۔ «اللهُ أَكْبَرُ» «اللَّهُ أَكْبَرُ» «اللَّهُ أَكْبَرُ» «اللهُ أَكْبَرُ» «أَشْهَدُ أَنْ لَا إِلَهَ إِلَّا اللهُ» «أَشْهَدُ أَنْ لَا إِلَهَ إِلَّا اللَّهُ» «أَشْهَدُ أَنَّ مُحَمَّدًا رَسُولُ اللَّهِ» «أَشْهَدُ أَنَّ مُحَمَّدًا رَسُولُ اللَّهِ» پھر آپ نے مجھ سے فرمایا: تم اس میں ترجیع کرو اور اپنی آواز کو بلند کرو۔ پھر آپ نے یہ کلمات کہے: «أَشْهَدُ أَنْ لَا إِلَهَ إِلَّا اللَّهُ» «أَشْهَدُ أَنْ لَا إِلَهَ إِلَّا اللهُ» «اَشْهَدُ أَنَّ مُحَمَّدًا رَسُولُ اللَّهِ» «أَشْهَدُ أَنَّ مُحَمَّدًا رَسُولُ اللَّهِ» «حَيَّ عَلَى الصَّلَاةِ» «حَيَّ عَلَى الصَّلَاةِ» «حَيَّ عَلَى الْفَلَاحِ» «حَيَّ عَلَى الْفَلَاحِ» «اللَّهُ أَكْبَرُ» «اللَّهُ أَكْبَرُ» «لَا إِلَهَ إِلَّا اللَّهُ» جب وہ اذان دے کر فارغ ہوئے، تو نبی اکرم صلی اللہ علیہ وسلم نے مجھے بلایا اور مجھے ایک تھیلی دی جس میں تھوڑی سی چاندی تھی آپ نے دعا کی۔ ”اے اللہ! اس میں برکت دے اور اس پر برکت دے۔“ راوی کہتے ہیں میں نے عرض کی: یا رسول اللہ! آپ مجھے اذان دینے کا حکم دیجئے نبی اکرم صلی اللہ علیہ وسلم نے فرمایا: ہم تمہیں حکم دیتے ہیں۔ راوی کہتے ہیں، تو میرے دل میں نبی اکرم صلی اللہ علیہ وسلم کے لئے جتنی بھی ناپسندیدگی تھی وہ سب محبت میں تبدیل ہو گئی پھر میں نبی اکرم صلی اللہ علیہ وسلم کے مقرر کردہ گورنر سیدنا عتاب بن اسید کے پاس آیا تو نبی اکرم صلی اللہ علیہ وسلم کے حکم کے تحت میں نے مکہ میں اذان دینا شروع کر دی۔ ابن جریج کہتے ہیں میرے خاندان کے کئی افراد نے ابن محیریز کے حوالے سے یہ روایت سیدنا ابومحذورہ کے حوالے سے مجھے سنائی۔ [صحیح ابن حبان/كِتَابُ الصَّلَاةِ/حدیث: 1680]