سیدنا عبداللہ بن ابی اوفی رضی اللہ عنہ بیان کرتے ہیں: ہم لوگ نبی اکرم صلی اللہ علیہ وسلم کے ہمراہ سفر کر رہے تھے۔ آپ صلی اللہ علیہ وسلم نے ایک صاحب سے فرمایا: ”اترو اور ہمارے لیے ستو گھول دو۔“ انہوں نے عرض کی: یا رسول اللہ صلی اللہ علیہ وسلم ! ابھی سورج (غروب نہیں ہوا) نبی اکرم صلی اللہ علیہ وسلم نے فرمایا: ”تم اترو اور ہمارے لیے ستو گھول دو۔“ وہ صاحب نیچے اترے اور انہوں نے ستو گھول دیے اور نبی اکرم صلی اللہ علیہ وسلم نے پی لیے۔ نبی اکرم صلی اللہ علیہ وسلم نے ارشاد فرمایا: ”جب تم رات کو دیکھو کہ وہ اس طرف سے آئی ہے اور دن کو دیکھو کہ وہ اس طرف سے چلا گیا ہے، تو روزہ دار شخص افطاری کر لے۔“ اس روایت کے متن میں شامل ہونے والے لفظ «اجْدَحْ» سے مراد ستوؤں کو بھگونا ہے۔ یہ بات امام ابوحاتم رحمہ اللہ نے بیان کی ہے۔ [صحیح ابن حبان/كِتَابُ الصَّوْمِ/حدیث: 3512]