امام جعفر صادق رحمہ اللہ اپنے والد (امام محمد باقر رحمہ اللہ) کے حوالے سے سیدنا جابر بن عبداللہ رضی اللہ عنہما کا یہ بیان نقل کرتے ہیں: فتحِ مکہ کے موقع پر نبی اکرم صلی اللہ علیہ وسلم مکہ کے لیے روانہ ہوئے، جب آپ صلی اللہ علیہ وسلم کراع الغمیم پہنچے تو لوگوں نے روزہ رکھا ہوا تھا۔ نبی اکرم صلی اللہ علیہ وسلم نے پانی کا پیالہ منگوایا، آپ صلی اللہ علیہ وسلم نے اسے بلند کیا، یہاں تک کہ لوگ جب آپ صلی اللہ علیہ وسلم کی طرف دیکھنے لگے، تو آپ صلی اللہ علیہ وسلم نے اسے پی لیا۔ اس کے بعد آپ صلی اللہ علیہ وسلم کی خدمت میں عرض کی گئی کہ بعض لوگوں نے ابھی بھی روزہ رکھا ہوا ہے۔ نبی اکرم صلی اللہ علیہ وسلم نے فرمایا: ”وہ نافرمان لوگ ہیں، وہ نافرمان لوگ ہیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”وہ لوگ نافرمان ہیں“ نبی اکرم صلی اللہ علیہ وسلم نے ان کے لیے یہ لفظ اس لیے استعمال کیا ہے کیونکہ نبی اکرم صلی اللہ علیہ وسلم نے جب انہیں یہ حکم دیا تھا تو انہوں نے اس پر عمل نہیں کیا تھا اور وہ حکم روزے کو ختم کرنے کا تھا۔ اس سے یہ مراد نہیں ہے کہ وہ لوگ سفر کے دوران روزہ رکھنے کی وجہ سے نافرمان ہو گئے۔ [صحیح ابن حبان/كِتَابُ الصَّوْمِ/حدیث: 3549]