سیدنا سبرہ بن ابوفاکہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”بے شک شیطان، انسان (کو گمراہ کرنے) کے لیے اسلام کے راستے میں بیٹھ جاتا ہے، وہ اس سے دریافت کرتا ہے: کیا تم اسلام قبول کرنے لگے ہو اور اپنے دین کو اور اپنے آباؤ اجداد کے دین کو ترک کرنے لگے ہو؟ اگر آدمی اس کی بات کو نہ مانے اور اسلام قبول کر لے تو اس کی مغفرت ہو جاتی ہے، پھر شیطان اسے (پھنسانے کے لیے) ہجرت کے راستے میں بیٹھتا ہے۔ شیطان اس سے کہتا ہے: کیا تم ہجرت کرنے لگے ہو؟ تم اپنی زمین اور آسمان کو چھوڑنے لگے ہو؟ اگر وہ شخص اس شیطان کی نافرمانی کر کے ہجرت کر لے تو پھر شیطان اس کو (گمراہ کرنے کے لیے) جہاد کے راستے میں بیٹھتا ہے۔ شیطان اس سے کہتا ہے: تم جہاد میں حصہ لینے لگے ہو؟ یہ تو جان اور مال دونوں کے ساتھ ہوتا ہے، تم لڑائی میں حصہ لو گے تو تم مارے جاؤ گے، تمہاری بیوی کہیں اور شادی کر لے گی اور تمہارا مال تقسیم ہو جائے گا۔ آدمی اس کی بات نہیں مانتا اور جہاد میں حصہ لے لیتا ہے۔“ نبی اکرم صلی اللہ علیہ وسلم نے ارشاد فرمایا: ”جو شخص ایسا کرتا ہے اور پھر انتقال کر جاتا ہے تو اللہ تعالیٰ کے ذمے یہ بات لازم ہے کہ وہ اس شخص کو جنت میں داخل کرے، اور جو شخص (جہاد کے دوران) قتل ہو جاتا ہے تو اللہ تعالیٰ کے ذمے یہ بات لازم ہے کہ اسے جنت میں داخل کرے، اور اگر وہ شخص ڈوب کر مر جاتا ہے تو اللہ تعالیٰ کے ذمے یہ بات لازم ہے کہ وہ اسے جنت میں داخل کرے، اور اگر وہ شخص اپنی سواری سے گر کر مر جاتا ہے تو اللہ تعالیٰ کے ذمے یہ بات لازم ہے کہ اسے جنت میں داخل کرے۔“ [صحیح ابن حبان/كِتَابُ السِّيَرِ/حدیث: 4593]